Семіздік – әлем бойынша өршіп тұрған қауіпті дерт. Бізде оған халықтың 23 пайызы, яғни, 4 миллионы шалдыққан. Әсіресе, 40-43 жастағы әйелдер аурудың азабын көбірек тартып жүр. Ал, бұған олардың қомағайлығы мен жалқаулығы себеп.

Игорь Дашковский, хирург (Израиль):

-Адамдар қимылдауды қойған. Әрі тамақты көп жейді. Сөйтіп, семіздік асқына береді. Уақыт өте келе науқас өздігінен арықтай алмайтын жағдайға жетеді. Ондай кезде ешбір диета да көмектесе алмайды.

Семіздіктің тиімді емі – бариатрикалық ота. Ол арқылы науқастың асқазанын кішірейтіп, тамақ жеуін азайтуға болады. Сөйтіп, 1 жыл ішінде едәуір салмақ тастайды екен. Бізде мұндай операцияға мұқтаж адам көп болғанымен, жылына бар-жоғы 100 рет қана жасалады.

Орал Оспанов, хирург:

-Бізде жылына кемі 4 мың ота жасалуы керек. Бірақ, қазір 100 ғана операция жасалады. Өйткені, оның бағасы қолжетімсіз. Бариатрикалық хирургия арқылы артық салмақтан арылу құны елімізде 500 мыңнан басталып, 1 жарым миллионға дейін жетеді.

Ал, министрлік квота бөлуге асығар емес. Әрі елімізде семіздікке шалдыққандарға мүгедектік те берілмейді. Соның кесірінен, дер кезінде көмек көрсетілмей, қайтыс болып жатқандар бар. Өйткені, денені басқан май түрлі гормондар бөледі екен. Әрі бауыр, қант диабеті кеселдерін туындатады.

Сондықтан, отандық дәрігерлер білмегенін шетелдік мамандардан үйренуге кіріскен. Ол үшін Алматыдағы орталық ауруханаға израильдік мамандарды шақыртыпты. Қонақтар бариатрикалық хирургия бойынша шеберліктерін көрсетіп, бүгіннің өзінде салмағы 135, 170 келіні құрайтын әйелдерге операция жасады. Айтуларынша, бұдан кейін науқастар семіздіктен арылады. Ал, хирургтер біліктілігін арттырғанымен, операцияның қарапайым халыққа қашан қолжетімді болатыны белгісіз.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!