Бұл - бір үй үшін әкеден де, шешеден де айырылған бес бауырдың үлкені. Етегі жасқа толған Айнұр ата-анасының өліміне бірінші кезекте

Алатау ауданының бұрынғы судьясын кінәләйді. Айтуынша, Өмірзақ Серімов кезінде әділ шешім шығарғанда, мұндай қайғы болмас еді. 

Айнұр Омарбаева, Светлана Тұрғанбаеваның қызы:

-Сол заңсыз шешіммен біз үйді сатып алып отырмыз ғой. Менің әке-шешем өлді. Шешім болмағанда Мыңбаева ешқандай да мұрагерлік рәсімдей алмайтын еді. Және сата алмайтын еді.

Дауға себеп болған мына үй. Тұрғанбаевтар отбасы бұл баспананы 7 жыл бұрын тірнектеп жинаған ақшасына сатып алған. Ол кезде үйдің барлық құжаттары түгел болыпты. Алайда, 1 ай өтпей жатып, мұнда сот орындаушылары келіп, босатуды талап еткен.

Сөйтсе, бұл 2 мұрагер таласқан үй екен. Серімов алдымен солардың бірінің пайдасына шешім шығарып, ол әйел баспананы Тұрғанбаевтарға сатып жіберген. Іле-шала дәл сол судья өз шешіміне өзі қарсы шығып, үйдің басқа иесі пайда болады. Ал, екі ортада далада қалған Светлана Тұрғынбаева әділдік таба алмай ақыры өз-өзіне жанармай құйып, өртеніп өлген болатын.

Денесінің 85 пайызын күйік шалған әйелді құтқару мүмкін болмады. Қайғыдан қан жұтқан оның күйеуі де көп ұзамай көз жұмды. Ал марқұмның ұл-қыздары бұған тек судьяны емес, сот орындаушыларын да, үйді сатқан әйелді де кінәләйді. Тек жылдар өтсе де, ешкім жазаланбаған. Ал, қызметін асыра пайдаланып, әділетсіз шешім шығарды деп айыпталып жатқан Өмірзақ Серімов тағылған айыпты негізсіз деп отыр.

Өмірзақ Серімов, айыпталушы:

-Кінәмді мойындамаймын. Іс мүлдем қарауға жатпайды.

Тек жетім қалғандар бұл жолы соттан әділ шешім күтіп отыр. Олар айыпталушының тиісті жазаға тартылуын соңына дейін талап етпек. Ал, таласқа түскен үйдің қазір кімге тиесілі екені белгісіз. Баспананы босату туралы іс уақытша ғана тоқтатылған. Сондықтан, бұл отбасының кез-келген сәтте шаңырағынан айырылып, далада қалуы әбден мүмкін.  

Бізді Youtubе-та қараңыз! Бізді Facebook-та, Instagram-да, Telegram-да оқыңыз!