Жаз өтіп күн салқындай бастағанда шымкенттік шенеуніктер жылу маусымын да ойлай бастады. Бірақ миллионға жуық тұрғыны бар қалаға оның енді берілуі екіталай. Себебі, жылу жөнелтетін жалғыз кәсіпорын – 3-ші энергорталықтың газ өндірушілер алдында бір жарым миллиард қарызы бар. Сондықтан оған көгілдір отын берілмей жатыр.

Сайлаубай Жақыпов, «3-Энергорталық » АҚ бас директорының міндетін атқарушы:

-Бұған себеп, "Қуат" жылу орталық-3-ші мемлекеттік мекемесінің уақтылы қарызды жинамағандығына байланысты.   20 қыркүйекке дейін 1 млрд 540 миллион теңгені өтеу керек. Сол қарызды олар өтесе біз газдың алдында қарыздан құтыламыз. Одан кейін біз стансаны жіберуге дайынбыз.

«Қуат жылу орталық» дегеніңіз бұл энергорталық пен тұрғындар арасындағы делдал. Ондағылар 2 жылдан бері тұтынушылардың пайдаланған жылуының ақысын жинаумен айналысады, жылу құбырларын жөндейді. Бірақ, әкімдікке қарасты мемлекеттік кәсіпорын делдал болғалы қарыз қаптаған. Қарыздың миллиардтан асып кеткеніне шенеуніктер жылу ақшасын бермей жатқан тұрғындарды кінәләйді. Бірақ «Қуат жылу орталығы» мен жылу өндірушілер арасында екі жыл бойы тариф бойынша түсінбеушілік болыпты. Енді шаш етек қарыздан құтылу үшін қалалық әкімдік энергоорталықтың өзіне тиесілі бөлігін сатып, берешегін өтемек.

Нұрлан Бектұрсынов, Шымкент қалалық тұрғынүй-коммуналдық шаруашылық бөлімінің басшысы:

-Қазір  бір 20 пайыз акциясын сатып осы қарызын жабайын деп отырмыз. Алда ондай мәселе кездеспейді. Себебі, қазіргі таңда ресми түрде Антимонопольный комитет арқылы тарифтің орнына келтіріп белгіленді. Енді ондай мәселе туындамайды.

Мәселені шешу үшін қолдағыны сатып қана құтылуға әуес шенеуніктер он күн ішінде қарызды толық жабамыз деп отыр. Сөйтіп, 15 қазанға дейін Шымкентті түгел жылу маусымына даярламақшы. Қала жылусыз қалмайды деп уәде берген шенеуніктер содан соң қарызға батқан тұрғындарға шүйлікпек. Қазір шымкенттіктердің жылу үшін берешегі 154 миллионға жетіп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!