Шешімінен ши шығып, бүгінде судьядан айыптыға айналған Өмірзақ Серімовке қатысты сот отырысы шұғыл бұрылыстарға толы болды. Өзін өртеп, бақилық болған Светлана Тұрғанбаеваның өліміне қатысы жоқ екенін кезекті рет қайталаған экс-судья, мәселенің мән-жайын анықтау үшін марқұмға психологиялық сараптама жүргізу керек деп айды аспаннан бірақ шығарды.

Өмірзақ Серімов айыпталушы:

-Бұл мәселені тергеу органдары , сот органдары көп кезде қолдап бұндай сот экспертизасын тағайындайтын жағдайлар болған. Онда тұрған ештеңе жоқ. Қылмыстық іс материалдары бар, атқару материалдары бар.

Серімов таяқтың екі ұшы барын айтады. Яғни, сот орындаушысы Елтоқовтың сол күні Тұрғанбаеваның тілін таппай, жанжалға түсуі өлімге себепкер болды дегенге меңзеп отыр.

Айнұр Омарбаева Светлана Тұрғанбаеваның қызы:

-Сот орындаушысы емес, ол өзі кінәлі болып тұр. Өзі кінәлі! Сол үшін сот орындаушыға жабайын деп отыр.

Ботадай боздап анасынан айырылған балалардың өзектері әлі күні ащы өксіктен өртенеді. Өмірзақты өмір бойына қарғамасақ, кешірмейміз дейді.

-Светлананың баласымын. Айуансың! Сен  құрттың шешемізді!

Марқұмға сараптама жасауды ұсынған Серімовтің өлі адамдармен тырнақшаның ішіндегі «байланысы» бұрыннан бар болып шықты. Алматылық, Әлімжан Аңсаров та 2010 жылы экс судьяның шешімімен далада қалған. Бір қызығы, іс бір жыл бұрын қайтыс болған адамның пайдасына шешілген.

Әлімжан Аңсаров Алматы қаласының тұрғыны:

-Ол 2009 жылы қайтыс болған. Алаяқтық жолмен біздің баспанамызды тартып алды. Мен бұл жерге әділдік іздеп келем. Серімов өз жазасын алар деп сенемін.

Сергелдеңге түскен Светлана Тұрғанбаеваның балалары Серімовтің судан таза, сүттен ақпын деген сөзіне сенгісі жоқ. Жазықсыз жанды жер жастандырған судьянаның өзі сотталмайынша тоқтамаймыз деп бекініп отыр. Келесі отырыс бір аптадан кейін жалғасады. Бірақ, атышулы істің нүктесі қашан қойылатыны әзірге белгісіз. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!