Петропавлда Ресей бензинін сататын бекеттер баға жазылған тақтайшаны бүгін таңертең ауыстырды. Қанша наразы болса да амалы жоқ жүргізушілер көліктеріне қымбат отын құйдырып жатыр. Өйткені өңірдегі бекеттердің 70 пайызы көрші елден тасылатын жанармайды сатады. Бұл жағдайға Ресейдің көтерме саудамен айналыстан фирмалары кінәлі деген кәсіпкерлер жүргізушілерге жаға ұстатарлық хабар жеткізді. 

Мәден  Жұмағұлов, «Регион» ЖШС директоры:

-Бүгінгі күні тек Омбы зауытынан ғана жағармай алып отырмыз. Бұрын Татарстан мен Башқұрстаннан да бензин тасушы едік. Бүгін -ертең Омбы зауыты жөндеу жұмыстарына жабылады деген қауесет бар. Ол расталса,оның үстіне Павлодар зауытында да жөндеу жұмысы басталса, онда өңірде бензин тапшылы сезілетіні анық.

Теріскейлік кәсіпкер меңзеген тапшылық Семей бекеттерінде қазірдің өзінде сезілуде. Әсіресе АИ-92 тапшы. Ірі жанармай құю орындары бір аптадан бері мүлдем қаңырап бос тұрса, шағын бекеттердегі отынның сапасы сын көтермейді деген жүргізушілер оларға жоламайды екен. Амалы жоқтар  АИ 95 маркалы бензиннің литрін 169 теңгеден құйдыруға мәжбүр.  

Арнұр Нұрланұлы, көлік жүргізушісі:

- 92 болмағандықтан 95 құюға тура келіп жатыр. Ал мұны біреудің қалтасы көтереді, енді біреудің қалтасы көтермейтіні белгілі ғой.

Бензин Астана мен Қарағандыда да қымбаттады. Еліміздің солтүстік өңірлерінің дені көрші ел отынына тәуелді екенін ескерсек, бағаның әлі де көтеріле түсетін түрі бар.  

Мұрат Нұрқанов, СҚО кәсіпкерлікті дамыту және туризм басқармасының бөлім басшысы:

 -Қыркүйекте  екі рет қымбаттады,  144-147-ге ,   147-150 теңгеге дейін. Кейбір жанар -жағармай станцияларында 150 теңгеге дейін жетіп отыр. Шекаралас болғандықтан енді 92 бензин әсіресе сол бензин бойынша тәуелді болып келеді бір 60-70 пайызға үлес.

Отын бағасына ресей рублі бағамының көтерілуі де кері әсерін тигізіп отыр. Оның үстіне көрші ел күні кеше ғана жанармай акцизіне салынатын салықты да көтерген көрінеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!