Төтенше оқиға түнде болды. Экипаж мүшелері сол уақытта Ақкөл ормандарын көктен бақылауға шыққан екен. От ошағын жақыннан көру үшін жерге қонбақшы болған.  Сол уақытта пилот тізгінге ие бола алмай қалса керек,  тікұшақ жерге соғылып, өрт шығыпты. 

-Ми-2 ұшағы міне Ақкөл маңындағы орманға жақын жерде құлаған. Ұшақтан қазір сау тамтық жоқ. Толығымен жанып кеткен. Апат болған аумақ қазір қоршауға алынған. Енді Азаматтық авиация комитетінен құралған комиссия апатқа нақты не себеп болғанын анықтауы тиіс.

Әуе кемесі қонуға төмендеп келе жатқанда мына жерге соғылған. Мұнда апат іздері анық көрінеді. Қатты соққыдан алдыңғы шассиі жұлынып кеткен. Содан бір жағына ауып,отқа оранған.  Ал авиация комитеті тікұшақтың   түнде ұшуға рұқсаты болмаған айтып отыр. Бірақ бұған қарамастан көкке көтеріліпті.

ТОТЫ ӘМІРОВА, АЗАМАТТЫҚ АВИАЦИЯ КОМИТЕТІ ТӨРАҒАСЫНЫҢ ОРЫНБАСАРЫНЫҢ МІНДЕТІН АТҚАРУШЫ:

- Қағаздарын тексертеміз. Ұшқыштарды да тексертеміз. Бұл сағат түнгі  1-де ұшып шыққан. Өйтуге болмайды. Бұл тікұшақтар түнде ұша алмайды. Ол тәртіпсіздік.

Ал,  тікұшақ ішінде үш адам болған. Борт командирі Александр Маньков,  екінші ұшқыш Думан Байбосынов және борт механигі Геннадий Балуев.  Бәрінен де соңғысы лезде тұтанған керосинге күйіп, ауыр жарақат алған. Оларды құтқарушылар таулы орманның ішінен екі сағатқа жуық уақытта әрең тауып ауруханаға жеткізген.

НАДЕЖДА ДУТКИНА, АҚКӨЛ АУДАНДЫҚ АУРУХАНАСЫНЫҢ ДӘРІГЕРІ:

-Үш адам  келіп түсті. Екеуінің жағдайы жақсы. Оларды бірден үйіне қайтардық. Тек біреуінің денесінің 45 пайызын күйік шалған.  Дер кезінде қажетті көмекті көрсеттік. Қазір емін жалғастыру үшін науқас Астанаға ауыстырылды.

Бір айта кетерлігі өртенген Ми-2-«Тян-Шань» әуе компаниясына тиесілі,ал, экипаж мүшелері соның қызметкерлері. Зардап шеккен Белорусь  азаматы Геннадий Балуев тіпті, келісім бойынша осы әуе компаниясында жұмыс істеп жүріпті. Мұндағылар әзірге апатқа қатысты түсінік беруден бас тартып отыр.

Ал Ақмола облысында  екі күнен бері орманы жанып жатыр. От ошағын анықтау үшін бұл тікұшақты жергілікті мемлекеттік мекемелердің бірі жалдаған болуы мүмкін. Құдай сақтап, адамдар аман қалды. Десек те, арнайы комиссия жауаптыларды жазаламақ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!