Жас шамасы бір жарым–екі жастағы балалар Заречный-2 ауылындағы көпір жанында жүріпті. Киімдері бүтін, тек үсті басы кір-қожалақ. Екеуінің де тілі шықпаған. Әке-шешесінің кім екенін айтпақ түгілі, аттарын білмейді. Оларды тауып алған тұрғындар дереу тәртіп сақшыларына хабар берген. Инспекторлар жақын маңды түгел шолып шыққанымен, еш нәтиже бермепті. 

Элвира Тарғынова, Заречный полиция бөлімінің инспекторы:

-Табылған жерден біз іздестіру жұмыстарын жүргіздік. Ата-анасын немесе олардың туысқандарын анықтау мақсатында. Бірақ ешқандай да нәтиже болған жоқ. Бұл балаларды ешкім танып білген жоқ.  

Далада тентіреп қалған ұл мен қыз қазір сәбилер үйінде тәрбиеленіп жатыр. Әке-шешесі табылған күннің өзінде біраз уақыт осында болатын сияқты.

-Бөбектер жатқан бұл  сәбилер үйінде тұмауға қарсы карантин жарияланған. Сондықтан мұнда ешкімді жолатпайды. Тіпті тәртіп сақшылары да балаларды көре алмай кері қайтты.

Мамандар бөбектердің бөлмесіне маңайлатпағанымен, жағдайларын баяндап берді. Табылған күні олар қатты тоңып қалыпты. Бірақ денсаулықтары жақсы және ешқандай сырқат белгілері табылмаған. Тәрбиешілері өздеріне ұнаған есімдерін де беріпті.

Жанна Дастанова, «Үміт» сәбилер үйінің әлеуметтік педагогы:

-Ұл баланы енді Медет деп қойды тәрбиешілер. Балада өз аты болуы керек қой. Ал қызды Үміт деп қойды. Құжаттары жоқ. Үстері кір. Қазіргі таңда балалар әп-әдемі, шаштары қиылды.

Тәртіп сақшыларының айтуынша, бөбектердің әкесі қазақ, шешесі еуропалық нәсілді болуы мүмкін. Балаларын бірнеше күннен бері іздемегеніне қарағанда әдейі тастап кеткен болар деген болжам бар. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!