Зіңгіттей жігіттің бір ай ішінде құр сүлдері ғана қалған. Осы уақыт бойы жансақтау бөлімінде жатып, жақында ғана көзін ашты. Отыз жастағы Серік Жантікеновтың тамыры соғып тұрғаны болмаса, саусағының ұшын да қозғалта алмайды. Сөйлемейді де. Қазір дәрігерлер ем-дом жасауды тоқтатқан. Тіпті, туыстарынан оны үйге алып кетулерін сұрапты. Қарсы болған соң ғана палатаға қалдыруға келісім берген. Енді науқастың жақындары ақ халатталарды оған дұрыс қарамады деп айыптап отыр.

Алмас Жантікенов, науқастың әкесі:

-Реанимацияда жатқаны 24-23 күні жатты. Біздерді кіргізген жоқ. Осы үшін талай айқай болды. Бұларда нейрохирург болу керек еді қарайтын практолог, уролог. Ана жатқан трубкасына дейін бір айлап ауысқан да жоқ.       

Дәрігерлер одан әрі ем жасауға Серіктің денсаулығы көтермейді деп отыр. Әзірге оны комадан шығарып алғандарына шүкіршілік етеді. Бірақ беті бері қарап, аяғынан тұрып кетеріне сенбейді.

Арыстан Рахымжан, Ақтөбе облыстық жедел жәрдем ауруханасының бас дәрігері:

-Ақшолақов профессор біз сол кісіге көрсеттік осында. Оның пікірі, прогнозы дейміз ғой, прогнозы жаман. Не болса да ол бала беті бері қарап түзелмейді деген сөз. Сөздің шынын айту керек. 

Серік қазір аурухананың күтім бөлмесінде жатыр. Ешқандай ем алмаса да, оны шығарып жіберуге дәрігерлердің құқығы жоқ. Ал туыстары құр қарап отырғанша көмек берер білікті маман табармыз деген үмітте. Сондықтан жан-жаққа сұрау салып жатыр.

Серік Жантікенов осыдан бір жарым айдай бұрын жол бойында такси тоқтатпақ болған. Жарысып келген екі көлік бірінің артынан бірі соғып, ақыры жігітті жаншып өтеді. Сол соққыдан Серіктің сүйектері сынған. Миына қан ұйып қалған. Бұл оқиғаға қатысты тергеу әлі жүргізіліп жатыр. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!