Атырау облысында патруль көлігінің астында қалған жігіттер ауыр хәлде жатыр
Атырау облысында полицейлердің көлігінің астында қалған Таңат Оразәлиев пен Нұржан Тәшеновтің жағдайы әлі де ауыр. Таңат есін енді жинап, тілге келсе, ал Нұржан облыстық аурухананың жансақтау бөлімінде ес-түссіз жатыр. Дәрігерлердің айтуынша, ол жасанды тыныс алу аппаратына қосылған. Айта кетейік, қос жігіттің аурухана төсегіне таңылуына себепкер болған оқиға Доссорда сенбіден жексенбіге ауған түні болған еді.
Автор: Жанар Низамутдинова
24.10.2017
Оқыс оқиға түнгі 12 шамасында дәл осы жерде болған. Полицейлер мінген көлік жол жиегінде кетіп бара жатқан Таңат Оразәлиев пен Нұржан Тәшеновті қағып өткен. Қатты соққыдан Таңат жол ортасына ұшып түссе, Нұржан көлік 30 метрге дейін сүйреп кеткен.
Соққының қатты болғанын қызметтік көліктің қазіргі түрінен де байқай аласыз. Қазір қаңтарылып тұрған оның алды майысып, терезесі шытынап кеткен. Ал сол оқиғадан зардап шеккендердің бірі Таңат Оразәлиевтің айтуынша, полицейлер бұларды әдейі қаққан.
Таңат Оразәлиев, зардап шегуші:
- Гайдың машинасы қисалаңдап келе жатты асфальттың үстінде. Мен ойладым, мыналарға не болды ішіп алған ба деп. Бір кезде бізге қарай шапты. Мен капоттың үстіне секіріп үлгердім, құрдасымды әрі қарай алып кетті.
Таңат сәл ес жиғанымен, досы Нұржан қазір өмір мен өлім арасында жатыр екен.
Ержан Тәшенов, Нұржан Тәшеновтың ағасы:
- Жағдайы өте ауыр. Бастан өте қатты зақым алған. Миына қан құйылған, миында үлкен ісік бар, өкпесі езілген, аппаратпен жұмыс жасап тұр. Екі аяғы түгелдей сынған - саннан және тізеден, інім қазір комада жатыр.
Оқиғаға қатысы бар учаскелік полицейлер Дәурен Тұрсынәлиев пен Азамат Жоламанұлы жігіттердің туыстарынан кешірім сұрап, көмек те ұсынған. Бірақ одан бас тартқан зардап шегушілердің жақындары тәртіп сақшылары «қарға қарғаның көзін шұқымайды» деген қағидамен жазаланбай қала ма деп қорқады. Бірақ полицейлер тергеу жүріп жатқанын жеткізді.
Назымгүл Қайсағалиева, Атырау облыстық ІІД баспасөз қызметінің жетекшісі:
-қазіргі кезде бұл оқиғаға қатысы бар аудандық ішкі істер бөлімінің қызметкерлері өздерінің жұмыстарынан шеттетілді. Сол күні тіркелген материал негізінде қазіргі таңда ҚР ҚК-нің 345 бабы , көлік құралдарын басқаратын адамдардың жол жүрісі немесе көлік құралдарын пайдалану қағидаларын бұзу негізінде тергеп-тексеру жұмыстары жүріп жатыр.
Бұл істі аудандық прокуратура да өз бақылауына алыпты. Ал тәртіп бұзған полицейлердің әріптестері зардап шегушілердің жағдайына қарай, қылмыстық іс дәрежеcі өзгеруі мүмкін деп отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
