Комедия жанрындағы фильмде басты кейіпкер Гаухар есімді қыз. Қарапайым жігітке ғашық болып, соған тұрмысқа шыққысы келеді. Бірақ, қарындасының таңдауын жақтырмаған ағалары күйеу жігітке нағыз сынақ ұйымдастымақ. Махаббатқа жету жолындағы мұндай түрлі оқиғалар көрерменді баурап алатын қызыққа толы.

Құралай Анарбекова, актриса:

–Аты айтып тұрғандай әрбір адамның өзінің таңдауы бар өмірде. Я болмаса жанұя ағаларымен, туысқандарымен қалып, я болмаса өзінің өмірін, болашағын құрып, сол белестерге өзінің жолдасымен жету. Өмірдегі Құралай барлық жолды таңдайды өзіне ұнайтын.

Құралай Анарбекова кинода басты кейіпкер ғана емес, фильмнің бас продюсері. Бұл оның түсірген алғашқы толықметражды туындысы. Мұнда кіршіксіз махаббаттан бөлек, адал достық, туыстық қарым-қатынастар кеңінен көрсетілген. Ал, кинода Құралайдың сүйген жігіті Айдардың рөлін  танымал актер Дәурен Серғазин сомдайды.

Дәурен Серғазин, актер:

– Өз махаббаты үшін ешқандай арамдыққа, алдауға бармай, таза жолмен өзінің арманына жетуді мақсат еткен образ.

Бірақ, адал жігіт ғашығына үйлене ала ма? Оның үстіне фильмде Құралайдың махаббаты үшін өзін-өзі қатты жақсы көретін ұшқыш Марсель де таласпақ. Оның рөлін белгілі актер Тәуекел Мүслім сомдаған. Ал режиссерлер отандық кинокартинаның сәтті шыққанына сенімді.

Әлішер Утев, сценарий авторы:

-Фильм сценариін жазу барысында рөлдерді сомдайтын актерлерді бірден білдім. Яғни, 80 пайызын осы адамдар сомдауы қажет деп таптым. Ал қалған 20 пайызын кастинг арқылы таңдап алдық. Қазақтарға жақын кино болып шықты деп ойлаймын.

Сонымен, Гаухар кімді таңдайды? Ал сұлу қыздың жүрегін жаулағысы келген ұшқыш Марсель қандай айла-тәсілдерге барады? Жауабын білгіңіз келсе, ертеңнен бастап еліміздің барлық кинотеатрларынан фильмді көруге болады. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!