Бір күн бойы шұңқырда жатқан Юлия Стонкустың денесі бүгін туғандарына берілді. Жақында жұмыстан қысқарғандықтан адам тасып нан тапқан марқұмның, бұл жұмысты істегеніне небары 3 ай ғана болыпты. Туыстарының айтуынша, жастайынан кикбоксингпен шұғылданған Юлия анау-мынау еркекке есе жібермейтін шымыр еді дейді. Сондықтан да таксиге қорықпастан шығыпты.

Кристина Хван, марқұмның әпкесі: 

- Сол күні ол үш еркекті алып, Шахтинск қаласына жеткізу керек болған. Бірақ ішіп алған олар Юлияны қаланың шетіндегі жаман жолмен жүргізген. Қозғалтқышы қызып кетіп, көлік жүрмей қалғанда әлгілер оған бас салған болып тұр. Денесі мен басынының сау тамтығы қалмаған. Әрең таныдық.

Полицейлер қала шетіндегі сынып тұрған көлікті көрген соң сол маңнан денені де тапқан. Бірнеше сағаттан соң таксиге тапсырыс берген күдікті де қолға түсіпті. Болжам бойынша, ұрыс машинаның бұзылып қалуына байланысты шыққан.

Бақытжан Құдияров, Қарағанды облыстық ІІД баспасөз хатшысы:   

- Негізгі күдікті 35 жастағы Шахтинск қаласының тұрғыны. Мұның алдында істі болған. Оның айтуынша қасындағы екі сыбайласы марқұмның денесін жасыруға ғана көмектескен. Бірақ бұл түсініктемелер әлі де тексеріледі.  

-Полицейлер әзірге тергеу құпиясы дегенді алға тартып, бұл іске қатысты көп нәрсені айтпай отыр. Сондықтан Юлияның туыстары қылмыстық іс бұрмаланып кете ме қауіптенеді. Ал туғандарының қолына бүгін ғана тиген марқұмның денесі ертең жерленеді. Оның артында 2 жасар ұлы қалды. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!