Бірден айта кетерлік жәйт, қызу талқыға түскен Тоқтар Төлешовтің үкімін оқу кезінде не бір қорғаушысы, не туыстары болған жоқ. Ал экс-олигархтың өзі тағдыры шешіліп жатса да әдеттегідей жымиған қалпынан танған жоқ. "Салықтан жалтару", "өкілеттігін асыра пайдалану" секілді баптармен айыпталған оған сот бір баппен 5, екіншісімен 2 жыл тағайындаса да алдыңғы 21 жыл жазасына сіңдірді. Яғни, сол 21 жыл өзгерген жоқ. Дегенмен, сатылған сырадан төленбей қалған қыруар салық өндірілуі тиіс.

Айдос Сұлтанов, Еңбекші аудандық сотының төрағасы:

-ОҚО Прокуратурасының талап арызы қанағаттандырылып отыр. Мемлекетке 1млрд 368 млн 587 мың 455 теңге мемлекет  пайдасына өндіріліп отыр.

Сот шешімі бойынша бұл соманы Төлешов бір айдың ішінде төлеуі керек. Әйтпесе мәжбүрлі түрде өндіріледі екен. Одан өзге 3 миллионға жуық сот шығыны бар. Төрт айдан бері тергеліп жатқан істе Тоқтар Төлешовтен өзге тағы 8 адам болған еді.

Салықшылар, сыра зауытының есепшілері мен бизнесмендерден құралған топтың жетеуіне осыған дейін үкім оқылған. Бесеуі рақымшылыққа ілінсе, біреуінің айыбы қысқарып, тағы біреуі шартты түрдегі жазамен құтылған. Ал бүгін Төлешовпен бірге сотталған салықшы Нұржан Қарақожаевтың бостандығы 2 жылға шектелді. Сот процессі басталғалы күлімдеумен болған Төлешовтің соңына қарай жүйкесі жұқарған болуы керек, тағылған айып пен соттың өзін театрға балады.

-Я говорю все это надуманное преступление. У меня нет преступлении ни одной.

Былтыр қаңтар айының соңында "кісі өлтірді" "қылмыстық топ құрды" тіпті "мемлекеттік төңкеріс" жасамақ болды деген айыппен ұсталған Төлешов, бағана айтылғандай, 21 жылға сотталған. Бүкіл дүние-мүлкі тәркіленді. Енді экономикалық қылмыстармен жазасы ауырламаса да бір жарым миллиардқа жуық қарыз болып қалған ол шағым жазам деп отыр. Бірақ, экс-олигархтың өзі нәтиже шығарына сенбейді

Бізді Youtubе-та қараңыз! Бізді Facebook-та, Instagram-да, Telegram-да оқыңыз!