Петропавлда мұз құрсауында қалып қойған аққулар құтқарылып жатыр

Қазір түрлі тоғандардан жиналған 17 құс қауіпсіз жерге шығарылған. Құстарды құтқару операциясын төтенше қызмет мамандары мен табиғат жанашырлары жылда өткізеді. Әдетте олардың дені – кеш жұмыртқа жарғандықтан, қанаттары бекімей, алыс жолға жарамай қалғандар. Құстар мекендеген судың беті қатып, қанаттылар жем таппай, аралда қалғандай күй кешеді. Бәрі де қызыл кітапқа енген сыбырлауық  аққулар. Құтқарылған құстар жылу электр станциясының техникалық суы жиналатын канал  мен жергілікті ботаникалық баққа орналастырылды.