Жапония императорының тақтан кететін күні белгілі болды

83 жастағы Акихито 2019 жылдың 30-шы сәуірінде тақты мұрагеріне өткізбек. Император жасының келгені және денсаулығының сыр бергеніне байланысты тақтан бас тартқан. Ол өзінің мұндай шешім қабылдағанын өткен жылы мәлімдеген еді. Тіпті, Жапония парламенті оған өз еркімен тақты тапсыруға мүмкіндік туғызатын заң да қабылдады. Себебі, елдің дәстүрі бойынша император өмірден өткенше тақта отыруы тиіс. Енді император кеткеннен кейін үлкен ұлы, 57 жастағы ханзада Нарухито таққа жайғасады. Айта кетейік, Акихито 1989 жыл таққа отырған болатын.