Бір жастағы Абзал Асқарбек, туа бітті гемофилиямен сырқаттанады. Тіпті, қыркүйек айында денсаулығы сыр берген сәбиді, әрең дегенде ажалдан аман қалыпты. Атасының айтуынша, тек тегін берілетін қымбат дәрінің құдіреті көмектескен.

Асқарбек Қойбағаров, Алматы облысының тұрғыны:

-Институттан гематологты алдырдық. Укол салдырдық балаға. Содан сақтап, гемоглабинін көтеріп, баламызды аман алып қалдық. Бір дәрі, орта есеппен 700 мың теңге тұрады. Екеуін салды. Сонда бір түнде менің немереме 1,5 миллион кетіп тұр.

Алайда, келер жылы гемофилия дерті деңдегендер тегін дәріден қағылуы мүмкін.  Дабыл қаққан мамандардың айтуынша, бағасын ешкімнің қалтасы көтермейтін препараттарға мемлекеттік сатып алу жөнінде тендер жарияланбапты.

Тамара Рыбалова, «Гемофилияға шалдыққан мүгедектер» қауымдастығының президенті:

-2016-2017 жылдарға елімізде гемофилияға  9 миллиард теңгеден астам қаржы бөлінінген. Бірақ, 2018 жылға тендер жоқ. Себебі,  денсаулық сақтау министрлігінің тамыздағы 631-ші бұйрығында, тегін медициналық көмектің кепілдендірілген көлемі бойынша дәрі-дәрмек сатып алуға   гемофилия енбеген. Ал, кейінгі амбулаторлық емдеуге қатысты бұйрықта тізімге алынған. Сонда науқасқа дәрі-дәрмексіз қалай амбулаторлық емдеу тағайындалады.

Егер қаупіміз расталса, мемлекет науқастарды далаға тастағанмен бірдей дейді Тамара Рыбалова. Себебі, денесі жарақат алса, қаны ұйымайтын сырқаттарға дереу қымбат дәрінің күшімен жәрдем жасалуы тиіс. Ал, елімізде сирек кездесетін мұндай дертпен ауыратын 387 бала, 741 ересек адам бар екен. Бірақ,  министр Елжан Біртанов, жұртшылықтың зәре-құтын қашырған қауесетті жоққа шығаруға тырысып бақты.

Елжан Біртанов, ҚР Денсаулық сақтау министрі:

-Біз керісінше, сирек кездесетін аурудан зардап шегетін балалар үшін дәрі-дәрмектер тізімін арттырдық. Ал, гемофилия бойынша бағаның айқындығы нақтыланбады. Осы тұрғыда мәселе туындағандықтан, қосымша зертеу жүргіздік.7-ші желтоқсанда жаңа конкурс жариялаймыз.

Министр уәдені үйіп-төккенімен, дертіне дауа іздегендер оның сөзіне сенбейміз дейді. Себебі, екі күннен кейін жарияланатын тендерден көптеген компаниялардың мүлдем хабарсыздығын айтады.  Сондай-ақ, құзырлы минстрліктің гемофилиямен күресуде дәрменсіздік танытып, қырын қарап  отырғанына наразы. Олардың айтуынша, ерекше бақылауды қажет ететін науқастарға елімізде бар-жоғы 62 гематолог маман бар екен. Тіпті, бірде-бір арнайы орталық ашылмаған.  Қазір мәселесін хатқа тізіп жатқан дертті жандар, жақын күндері Үкіметке үндеу жолдамақ. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!