Қаралы бөлменің қара күйеге боялған терезесі өткен-кеткенге кешегі қайғыны еске салып тұрғандай. Адам нанғысыз оқиға шырт ұйқыда жатқан жатақхана тұрғындарын аяқтан тік тұрғызған. Санаулы уақыттың ішінде ескі нысан түтін құрсауында қалыпты. Абдыраған жұрт далаға ағылған.

- Ал, отқа оранған жатақхананың төртінші қабатындағы мына аядай ғана бөлме. Мұнда 44 жастағы ер адамның бұрынғы әйелі мен 2 баласы тұрып жатыпты. Ол түн ортасында соларға келген. Әрі өзімен бензин ала келіпті. Сөйтіп, соның көмегімен өзін де, балаларын да өртеп жіберді.

Айман Сағынбекова, көршісі:

- Балалар жатқан ғой ұйықтап. Сонда анау қойнына тығып келген бензинін. Өзіне құйып, балалардың үстіне құлаған дейді.

Көз көріп жүрген ер адамның мұндай әрекетке барғанына көршілер әлі сене алар емес. Олар бірден жедел жәрдем мен өрт сөндірушілерді шақырыпты. Бірақ, амал нешік. Өзіне бензин құйған әке де, оның 12 жастағы жасөспірім баласы да тірідей жанып кетті. Олар бүгін жер қойнына тапсырылған. Бөлмеде болған 18 жастағы қыз ғана тірі қалды. Онда да денесінің 90 пайызын күйік шалып, ауруханада хәл үстінде жатыр.

Айдар Сұлтанғазиев, Іле аудандық орталық ауруханасы бас дәрігерінің орынбасары:

- Қазіргі таңда жағдайы өте ауыр. Аппаратта.  Дәрілердің көмегімен ұстап отырмыз.

Олардың анасы болса дін аман. Ал, бұрынғы күйеуін мұндай жауыздыққа арадағы кикілжің итермелеген болуы мүмкін. Жатақхана тұрғындары бұған дейін айқау-шудың дауысын жиі естіпті. Сол күні де ұрысты құлақтары шалыпты. 

Айман Сағынбекова, көршісі:

- Бір әйел айтады, түнде 2-ден кеткенде әжетханаға барсам, ұрысып жатқан дейді. Ылғи ішіп келеді. Әйелі кіргізбейді. Кейде бірақ бірге жүреді, көреміз.

Өзін де, ұл-қызын да өртеген ер адам жергілікті ауруханада жедел жәрдем жүргізушісі болып қызмет етіпті. Ол қасақана қойған жалыннан жатақхананың дәлізі де қара түтін болған. Ыстың иісі де 4 қабатты алып кеткен. Ал, тұрғындар әлі өз-өздеріне келе алмай жүр. Тіпті, өліктер шыққан бөлмеге жақын тұратындары көшіп кеткен.

Сұлтанбай Жұмаділов, көршісі:

- Ыс алып кетті. Ешкім жоқ қой. Бәрі шок. Бәрі жан-жаққа кетті ғой.

Жалын газ баллондарына жетпей абырой болды дейді шошынған тұрғындар. Әйтпесе, бүкіл нысанды күлге айналдырар еді. Қазір қайғылы оқиғаны сақшылар бақылауға алды. Олар сотқа дейінгі тергеу амалдарын бастаған. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!