Нью-Йорктегі мына бір 5 қабатты үйдің тұрғындары таңды далада атырды. Көпшілігі әлі де ғимаратқа жақындауға қорқады. Күлі ғана қалған тіреулер кез келген уақытта сынып, төбе опырылып ортасына түсуі мүмкін. Өрттен зардап шеккендері түндегі оқиғаны қорқынышпен еске алады.

- Айналаның бәрі лапылдап жанып жатты. Көмек деп айқайлаған адамдардың жан дауысы әлі құлағымда тұр.Тұрғындар жан-жақа қашты

Қызыл жалын кеше кешкісін шыққан. Аз ғана уақыттың ішінде өрт бүкіл ғимаратты шарпыды. Оқиға орнына бірден Нью-Йорк мэрі Билл Де Блазио да жетті. Қала ауруханаларында қазір оннан астам адам жатыр. Алдын ала мәлімет бойынша, апаттан қаза тапқандар саны 12 адамға жеткен. Оның бірі бір жасқа да толмаған нәресте.

Билл Де Блазио, Нью-Йорк қаласының мэрі:

- Өрттің шығу себебі туралы айтуға әлі ерте. Мамандар оқиға орнында жұмыс істеп жатыр. Бірақ біз оттың көз ілеспес жылдамдықпен құрылысты түгел шарпығанын көрдік. Өкініштісі бұл өрт 12 адамның өмірін жалмады. Оның бірі кішкентай ғана сәби. Тағы төрт адам өте ауыр хәлде ауруханада жатыр.  

Жалынды ауыздықтауға екі жүзге жуық өрт сөндіруші жұмылдырылған. Олар өртпен бес сағатқа жуық арпалысты.

Розария Ревера:

- Бұл түн өте ауыр болды. Үрей мен өрттің түні. Түндегі жағдай көз алдымнан кетер емес. Мен тек ертеңкісін ғана өз пәтерімнің қандай күйде екенін көрдім. Сау жері жоқ.

Билік өрттің жылдам таралуына тұрғындардың кіре берісте және әр қабаттың баспалдағында тез тұтатанатын заттар мен сұйықтықтарды сақтауы себеп болуы мүмкін деп отыр. Шенеуніктер зардап шеккендерге материалдық көмек көрсетіп, оларды уақытша тұратын бекеттерге орналастыруда. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!