Бүгінде сақылдаған сарышұнақ аяз павлодарлық орман қызметкерлерін аяғынан тік тұрғызды. Оған себеп осы  өңірді мекен ететін 15 мыңға жуық жабайы жан-жануар аштан қырылып қалудың аз-ақ алдында тұр. Сондықтан жергілікті орманшылар, оларды кезең-кезеңімен ғана қоректендіруге мәжбүр. Айтуларынша, мұндай шұғыл әрекетке көшпесе, елігі, маралы, шошқасы, қояны  тағы басқасы, аязды көтере алмай қалуы мүмкін.

Владимир Перескоков, Павлодар облысы орман шаруашылығы инспекциясының бас маманы:

-Егер, жануарлар тоқ болса, олар аязды жақсы көтереді. Қосымша, қоректендірмесек суық қысып қыстан шықпай қалуы ғажап емес.

Ал қытымыр аяз дала тұрмақ, қолда күтімде тұрған аңдардың өзін қыспаққа алып жатыр. Мәселен, Семейде күндіздің өзінде түспеген 32 градус суық, жергілікті зообақтағы жануарларды әбіржітіп жіберген. Қазіргі уақытта, мамандар далада тұрған аңдардың астына сабан төсеп, үйшіктерін қамыспен қымтап әлек. Әсіресе, олардың басты назары орталыққа жылы жақтан жеткізілген жануарларда. 

Ләззат Жүнісова, Семей қалалық биологиялық орталығының көпшілік іс-шара ұйымдастыру әдіскері:

-Ең бір негізгісі, біздің жануарлардың ішінде Оңтүстік Америкадан келген Лама Гуанака бар. Оған қазіргі кезде көп көңіл бөлінуде. Яғни оның үйшігі сыртынан жабылады.

Сондай-ақ, тордың ішінде дірдек қағып тұрған жануарлардың күнделікті қорегі де әдеттегіден 20 пайызға артқан. Сондықтан мамандар, аяздың беті қайтқанша, оларға жем-шөпті үш мезгіл беріп отырамыз, дейді. Ал, суыққа төзімсіз құстардың барлығы, әлдеқашан жылы қораға еңгізілген екен.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!