Сахна сыртындағы спектакль: Ерлан Біләлді ұстап берген атышулы Баянов мәлімдеме жасады
Бір жарым миллион теңге парамен ұсталған Әуезов театры директорына қатысты сот процесі мүлдем басқа қырынан өрби бастады. Атышулы істегі басты куәгер - Қайрат Баянов күтпеген жерден тергеушілерге қарсы шағымданып отыр. Айтуынша, «жемқорларды тұзаққа түсіруге арналған қорда ақша қалмады» деген сылтаумен Ұлттық бюроның жедел уәкілдері одан 600 мың теңге қарызға алып, сол күйі қайтармапты. Ал ол ақшаны Біләл баяғыда-ақ жұмсап жіберген. Сондай-ақ бүгінгі сотта сол параның қалай алынғандығы жөнінде бүге-шүгесіне дейтін айтылды.
Автор: Аруна Ортай
31.01.2018
Біләл хикаясының одан сайын өрбитін түрі бар. Бүгінгі сот отырысына атышулы актер үйінен келді. Өйткені, Ерлан Біләл кінәсін бірден мойындағандықтан, қолхатпен бостандыққа жіберілген болатын. Ал қомақты соманы ол балалардың жаңажылдық кешін ұйымдастырушылардан алған. Әйгілі «Сезам» театрының басшысы залды жалға алу үшін «әкем театрдағы» әріптесіне бақандай бір жарым миллион теңге ауызбастырық беріпті. Біләл сол ақшаның екінші жартысын, яғни 900 мың теңгені алып жатқанда ұсталғанын айта кетейік. Біләлдің өзі мұны сыйлық деп ақталуға тырысқанымен, Қайрат Баянов мүлдем басқаша айтады. Біләл бопсалады, тіпті «ақшаны әкелмесең, спектакль өтпейді» деп қоқан-лоқы жасады дейді Сотта сөз алған «Сезам» театры басшысы. Бүкіл труппа далада қалатын болған соң, Баяновтың арызданудан басқа амалы қалмапты. Алайда, Ерлан Біләлді ұстап беруі сол екен аяқасты халық жауына айналып, әріптестері де теріс айналған.
Қайрат Баянов, «Сезам» театрының директоры:
-Бүгін мен далада қалдым! Далада! Не үшін бәрі маған жабылып, бүкіл...Мен не, не істедім? Мен тек қана жақсылық істегем!
Бұдан бөлек, бүгін істің құпия тұстары да айтылды. Сөйтсе, Біләл Баяновтан ақшаны жаңа жыл кеші өтпей жатып, алдын ала беруді талап етіпті. Жапонияға жолға жиналған театр басшысы жүріп-тұрғанға бір жарым миллион теңге керек депті-мыс. Бірақ, параны сол кезде санап беруге тергеушілер рұқсат бермей, уақытты создырған екен. Параның бірінші бөлігін Біләл театр ішіндегі темекі шегетін бөлмеге алдырған. Ал қалған екінші бөлігін, яғни 900 мың теңгені сахна сыртындағы қараңғылау жерге алып келуді тапсырады. Сол ақшаны алу кезінде, сахна сыртында ұсталған. Десе де, істің бүгін-ертең бітетін түрі жоқ. Өйткені, енді сол пара ретінде берілген ақшаға қатысты үлкен дау шыққалы тұр.
Қайрат Баянов, «Сезам» театрының директоры:
-Тергеу маған «600 мың алып кел деп айтты. Бізде қазір жаңа жылдың алдында ақша жоқ» деп. Мен алып келдім 600 мың теңге. Енді маған бірде бір қағаз берген жоқ. Қайда 600 мың теңге? Қайда ол?Мен қазір сұрап жүрмін «беріңізші бір қағаз! Мен сізге алып келдім ғой 600 мың» деп.
Сол 600 мың теңгесін даулаған Баянов бүгін тергеушілерге қарсы шағым түсірді. Ал ол ақшаны Біләл баяғыда-ақ қарыздарына таратып жібергенін айтқан болатын. Сотта оны өзі мойындады. Судья осы ақшаға қатысты азаматтық істі сотқа дейін реттеу үшін тараптарға уақыт берді. Ал пара алу жөніндегі қылмыстық істің жарыссөзі ақпан айының бесінде болмақ.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
