-Кеш жарық! Бір жыл өтсе де былтырғы тасқынның жыры әлі біткен жоқ. Баспанасы бүлінгендерге халықтан жылу жинап қана көмек берілді. Ал мемлекет тарапынан көк тиын алмады десек артық айтпағаным болар.

Өйткені су басқан мыңға жуық шаңырақ бау-бақша ұжымында орналасқан. Сондықтан өкіметтен оларға шығынын қайтару қарастырылмапты. Тек әкімдік бірнеше отбасыға жер телімдерін бөліп берді.  Соған тасқыннан зардап шеккен тұрғындардың бірсыпырасы асарлатып жүріп үй салды. Қауіпті аймақта қалған өзге тұрғындарды шенеуніктер жаппай көшіреміз деп отыр. Қаланың басқа шетінен үй салып бермекші. Бірақ ол әрине тегін үлестірілмейді. Несиеге рәсімдейміз деген жоспарлары бар. 

Бекболат Нұрашев, Ақтөбе қалалық төтенше жағдайлардың алдын алу бөлімінің басшысы:

-Сол дайындалып тұрған участікке инженерлік-комуникация өткізуге қажетті жобалық-сметалық жобалар дайындалды. Үй салуға қажетті жобалар дайын. Қазір өзіміздің ұсынысымызды өкіметке бердік.

Бүгінде 43 ауылды су басу қаупі бар. Былтыр су астында қалған елді-мекендерге биыл тағы қауіп төніп тұр екен. Әсіресе, Қарғалы, Сазды өзендерінің бойындағы үйлерге. Қыста ылғал аз түскенімен, тоң жібісе осы өзендердің арнасы көтерілуі мүмкін. Тұрғындарға құтқарушылар тасқынның алдын алуға өз күштеріңмен қам-қарекет етіңдер деп отыр. Өтен жылдан олардың да ауызы күйсе керек, суға жақын орналасақна, бау-бақша ұжымындағыларға шығын өтелмейтінін айтып байбалам салды.

Қайрат Қасым, Ақтөбе облыстық ТЖД бастығының міндетін атқарушы:

-Шойын жолдың бойында отырып, пойыз өткеніне таң қалған адамдай болмайық. Өзен бойынан үй салған екен, оған қауіп болады. Саяжай аумағындағы баспаналар тасқыннан бүлінсе, негізсіз шығыны өтелмейді.

Қазір бюджеттен 190 миллион теңге қарастырып қойыпты. Оған жанармай шығыны, құм толтырылған қаптар, басқа да керек-жарақ аламыз дейді әкімдіктегілер. Ал төтенше жағдай жариялана қалса аймақта 1 миллиард 67 милиион резерв ақшасы бар екен.

Ең бастысы, былтырғы тасқыннан соң өңірдегі бірқатар су қоймалары мен бөгеттер шамалы жаңаланып қалды. Сондықтан «Қазсушар» мекемесіндегілер жайбарақат отыр. Оған қоса қыста қар аз түсіп, су қоймалары толмаған. Ондағылар керсінше тоң жібісісе сол ылғалмен орнын толтырамыз деп отыр. Көктемде енді тіпті су қоймасынан өзендерге бір тамшы су жібермейді. Бұл да болса тасқынның алдын алуға сеп болады.

Бекзат Наметов, «Қазсушар» РМК Ақтөбе филиалының директоры: 

-Биыл біз екі ірі су қоймасынан ешқандай суды төмен ағызбай, соны жинап, өзімізде сақтаймыз деген болжамды айтайын деп отырмын. Олардың мөлшері өтен жылдағыға қарағанда 50 пайыздан төмен. 48,38,28 пайыз ғана.

-Ақтөбеде қар еріп, тоңның жіби қоюына әлі ерте. Тек наурыздың жиырмасынан соң күн жылынады деп отыр синоптиктер. Оған дейін жауын жаумайды, керсінше айдың алғашқы он күндігінде аяз күшейеді дегенді айтты синоптиктер. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!