Жалғыз ұлынан айрылған Райхан Есенаманованың көз жасы жарты жылдан бері құрғаған емес. Отыздан асқан Ерханын өлтіргендердің әлі күнге дейін табылмай отырғанына күйінеді. Былтыр жазда марқұмды Джип көлігімен базардан біреулер келіп алып кетеді. Сол кеткеннен ұшты-күйлі жоғалған. Тек бір жарым ай дегенде қала шетінен сүйегі табылды. Дегенмен, базардағы бақылау камерасына көлік түсіп қалыпты. Бірақ оның кімге тиесілі екенін тәртіп сақшылары әлі күнге дейін анықтамаған.

Райхан Есенаманова, марқұмның анасы:

-Сыйақы тағайындап отырмын. Мүмкін көмек беріп айтқан адамдар болса, сыйақым бар. Адам жанашырлық көрсете ме дегенім ғой. Сол жерде көрген адамдар бар. Қаншама машина тұр соның ішінде. Соның біреуі де тексерусіз қалды. Біздің құқық қорғау органымыз ешқандай жұмыс атқарған жоқ.

Марқұмның туыстары сол күні базарда тұрған саудагерлерден өздері сұрап көріпті. Бірақ ол әрекеттерінен түк шықпаған. Құзырымыз болмаған соң ешкім ашық айтпады деп отыр. Ал тәртіп сақшылары қылмысты аша алмай отырғанын мойындайды.

Айдар Төкеев, Ақтөбе облыстық ІІД бастығының бірінші орынбасары:

-Бұл қылмысты қазіргі кезде тергеу тобы жұмыс істеп жатыр. Күнделікті болмаса да әр жеті сайын осы тергеу тобының жұмысын қадағалап отырмыз. Әлі ол қылмыс ашылған жоқ.

-Кісі қолынан қаза тапқан Ерхан Тілеуімбетовтің жақындары нақты қанша сыйақы тағайындағанын әзірге айтпай отыр. Өйткені жалған ақпарат бере салатын алаяқтарға алданып қалармыз деген күдіктері бар. Әйтсе де, тек ұлын жазда базардан алып кеткен Джип көлігі мен сол көлікті тізгіндеген адам туралы айтып берсе болғаны дейді олар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!