Әнұранмен басталып, қалыпты баяндамамен жалғасқан құрылтай орта тұсына келгенде алатайдай бүлінді. Төрт сағатқа созылған тартыста жазушылар одағының қазіргі бет-беделінен бастап, соңғы 22 жыл ішінде атқарылған жұмысқа талай сын айтылды.

Мұхтар Шаханов, Қазақстанның Халық жазушысы:

-Оразалиннің үлкен еңбегі бар. Ол қандай еңбек? Нұрлан биліктегі басшылардың туфлиін керемет шеберлікпен жалады.

Негізі, Нұрлан Оразалин бір ай бұрын өткен пленумде, тіпті осы құрылтай барысында да, енді сайлауға түспейтінін ескерткен. Бірақ, желдің қай бағыттан соғатынын аңғара алмаған қаламгерлер, көңілдегі күдіктерін де жасырмады.

Қабдеш Жұмаділов, Қазақстанның халық жазушысы:

-Қолдан жасалған қаһарманның қажеті жоқ бізге. Білмеймін, Нұрлан өткенде қоштасып кеткен, тағы қоштаса ма, білмедім.

Нұрлан Оразали, ақын:

-Өткен жолы пленумда үндеген жоқпын. Ал, үндемегенге басына беруге болмайды, жолдас Жұмаділов. Бәріңізден сұраймын, жинақы, жөндеп, жақсы, ықыласты жиналыс өткізу менің мақсатым.

Құрылтайда экс-төрағанының еңбегін жіпке тізіп мақтағандар да көп. Қаржыдан шашау шығармай, өз күнімізді өзіміз көрдік деп Оразалинді жерге түсірмегендер соңында оған "құрметті төраға" қызметін ұсынған. Бірақ, қаламгерлердің бұған да қарсы шығып, пікірлері қақ жарылды.

Төлен Әбдік, жазушы:

-Болмайды жігіттер. Берекесіздікке алып келмейік жазушылар одағын. Белгілі топтардың мүддесі үшін қызмет ептейік.

Қайт-қайта дауысқа салынған ұсыныс сол күйі аяқсыз қалды. Ал, құрылтай соңында одақтың төрағалығына бір үміткер, белгілі ақын Ұлықбек Есдәулет ұсынылып, ың-шыңсыз сайланды. "Жазушылар одағының мүшкіл жағдайын көзімен көріп жүрмін" деген жаңа басшы тұралаған жұмысты қайта түлетуге уәде берді.   

Ұлықбек Есдәулет, Қазақстан жазушылар одағының төрағасы:

-Алты ай бойы жазушылар одағының қызметкерлері, ішінде өзім де бармын, біз айлық дегенді көрген жоқпыз.  Шынын айтқанда тұралап қалған жазушылар одағына басшылыққа келу маған үлкен жауапкершілік жүктеп тұр.

-Қаланың қақ ортасында қасқайып тұрған мына ғимаратты кезінде Ғабит Мүсірепов бар беделін салып, Орталық комитеттен жазушылар одағына алып берген. Қаламгерлер содан бері құт-мекенге айналған шығырмашылық одақ ішінде береке-бірлік орнағанын қалайды. Ал, жаңа басшылық құрам, заман көшіне ілесіп, қоғам назарын қалам иелеріне аудартамыз деп отыр. Енді оның нәтижесіне алдағы бес жылдың ішінде көз жеткізетін боламыз.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!