Жәнібек Кірқабақовтың ұрылыр үйін тып-типыл етіп тонағалы қабағы кірбің тартқан. Алтыннан бастап, техникаға дейін түк қалмай қолды болған. Іле-шала полицияға шағымданғанмен, іс әлі күнге жартастай орнынан жылжымаған.

Жәнібек Кірқабақов, Қараой ауылының тұрғыны:

-Үйреніп алды, бұл жерге дәндеп алды. Осы жерден шықпайды. 200 үйдей тоналды бұл жерде. Оны жарытып айтпайды ешкім, 15-20 деп жүр  ғой бәрі.

Қараой ауылында қылмыс соңғы бір жылда өршіген. Көпшілік үйде күндіз адам болмайтынын пайдаланған ұрылар арам ойларын оп-оңай жүзеге асырып, талай отбасыны қан қақсатып, зар жылатып келеді.. Тұрғындар олар топпен жүреді деп топшылап отыр.

Қаникен Жұмақанова, Қараой ауылының тұрғыны:

- Ұлымның киімінің қалтасынан алып кеткен 2 млн ақшаны.

Жәмила Атабаева, Қараой ауылының тұрғыны:

-Екі-үш ай өтті, ешқандай ұсталған ұры жоқ. Ешқандай көмек жоқ, халықтың бәрі жылап отыр осылай. Енді кімнен көмек сұрайтынымызды да білмейміз.

Жаяудың шаңы шықпас. Қараойға бекітілген жалғыз учаскелік полицейдің ұрыларды ұстамақ түгілі, ауылды аралап шығуға уақыты жетпейді. Тұрғындар мәселелерін жергілікті әкімдікке жеткізген. Олар болса керісінше, халықтың өзі ұрыны ұстауға көмектессін деп қарап отыр.

-Соңғы санақ бойынша Қараойдағы халық саны 6 мыңнан асып жығылады. Бұл елді мекеннің тыныштығын қорып, тәртібін сақтауға әзірге жалғыз ғана учаскелік полицей жауапты. Егер де аудандық, облыстық ішкі істер басқармасы бұл мәселеге араласып, полицейлердің санын арттырмаса ұрлық-қарлық көбеймесе азаймайын деп тұр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!