«Бала дауысы – 2018» балалар ұлттық ән байқауы биыл үшінші рет өткізілмек. Осы жолы іріктеу кезеңінде 14 облыс пен екі ірі қаламызды түгел қамту үшін іріктеу интернет арқылы жүргізіледі.

-Біз сені іздеп жүрміз. «Notka.kz» сайтына кіріп, сауалнаманы толтырып, ән айтып жатқан бейнежазбаңды жібер.

Ал клип камераға немесе телефонға түсіріліп, 256 мегабайттан аспауы керек. Байқауға 8 бен 12 жас аралығындағы балалар қатыса алады. Орындаушы кез келген тілде қалаған жанрда 2 немесе 3 ән үзіндісін фонограммасыз орындап, уақытын 3 минуттан асырмауы тиіс. Электронды өтініштер бүгіннен бастап қабылданып жатыр.

Мұрат Ихсанов, Әлия Назарбаеваның «Жандану әлемі» қорының басқарма төрағасы:

-Бірінші кезең, бұл іріктеу кезеңі. Екінші кезең бұл мамырдың аяғында Астанада өтетін үлкен гала-концерт Астананың 20 жылдығына арналған. Одан кейін жұлдызды үй. Ал соңғы соңғы кезең бұл 6 концерттік бағдарлама және гала-концерт.

Ән додасына қатысу үшін ауылдық жерлерден қалаға сабылып керегі жоқ. Оның үстіне, қатысушылардың киімі, жатын орны, жүріс-тұрысы түгел ұйымдастырушылардың мойнында. Қазылар алқасы болса, конкурстың кәсіби деңгейінің өте жоғары екенін айтады.

Майра Мұхамедқызы, қазылар алқасының мүшесі:

-Қазақтың ең беткеұстар талантты балаларының бағын осы «Бала дауысы» арқылы бүкіл әлемге жол тартатын, үлкен сахнаға жол тартатын бір өте жоғары деңгейдегі, профессионалдық деңгейдегі конкурс.

Үміткерлер бүгіннен бастап 15 сәуірге дейін клиптерін онлайн жібере алады. Сондай-ақ, 27-қазаннан бастап әр сенбі сайын КТК арнасынан ән байқауының барысын тамашалауға болады. Ал жеңімпаз 8-желтоқсанда Астанада «Қазақстан» орталық концерт залында өтетін финалдық бәсекеде анықталмақ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!