Александр Гапотченко су көп жиналатын мына аумақты жиі бақылап жүретінін айтады. Әйтпегенде маңайдағы еріген қар суы осында жиналып, үлкен көлге айналуы мүмкін дейді. Соның кесірінен бұл аумақта орналасқан үйлерді жылда су басады екен. Мұны ауданның коммуналшылары жақсы біледі. Тұрғындар болса, биыл да үйлеріне су кіріп кете ме деп алаңдап отыр.

Александр Гапотченко, Орал қаласының тұрғыны:

– Былтыр қарды уақытында шығарып, қауіптің алдын алды. Алдыңғы жылы бұл шаруаны кешіктіргендіктен маңайдағы судың бәрі осында жиналып, мына жер көлге айналған еді. Тағы қауіптеніп отырмыз.

Су басу қаупінің барын жергілікті атқамінерлер де мойындап отыр. Айтуларынша, қыс айларында аз жауған қар наурызда қалыпты мөлшерден көп түскен. Коммуналдық қызмет сол қарды әлі тазалап бітер емес. Ал синоптиктер демалыс күндері өңірде ауа-райының күрт жылып, жауын-шашынды болатынын ескертуде. Шенеуніктердің қазір жанталасып жатқаны да сондықтан.

Алтай Көлгінов, Батыс Қазақстан облысының әкімі:

-Коммуналдық мекемелер өзінің техникасымен жұмыс істеуде, бірақ ол қазір жеткіліксіз болып тұр. Сондықтан біз жол жөндейтін мекемелердің және құрылысшылардың техникасын тарттық. Ал алыс елді-мекендерде шаруа қожалықтардың техникасын да жұмылдырдық. Сонда барлығымыз бірге қазір осы наурызға дейін тазалып тастасақ, едәуір жеңілдеп қалады. Қауіп азаяды.

Құтқарушылар болса қазір күшейтілген тәртіпте жұмыс істеуде. Бұрын мұзды жарып тастау әдісін қолданған мамандар қазір оны арнайы құрылғымен ойып жатыр. Өйткені, жару амалы қауіпті әрі қоршаған ортаға зиянды екен. Орал аумағында үш бірдей өзен арнасының барын айта кетейік. Құтқарушылар қазір ондағы қауіпті аумақтардың бәрін жіті бақылауда.

Аягөз Қожанбаева, БҚО ТЖД  жедел құтқару жасағының бас құтқарушысы:

-Мұзды кесіп, оларды ойып олардың қалыңдығын әлсіретеміз.+Қала бойынша 19 орында Шаған және Деркөл өзендерінде, ал сонымен қатар облыста жүргізіліп жатыр. Бұл Тасқала, Зеленов және Ақжайық аудандары.

Болжамдарға қарағанда, биыл Орал өзенінің деңгейі былтырға қарағанда 6 метрге жоғары болады деп күтілуде. Тіпті, кейбір жерлерде 8,5 метрге дейін көтерілуі мүмкін. Бұл облыс орталығы аумағындағы саяжайлар мен өңірдегі елді-мекендерді су басу қаупі бар деген сөз. Сондықтан қазірдің өзінде жедел эвакуациялауға арналған 28 орын сақадай сай дайын тұр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!