Қызыл су Жоғарғы Үбіге кеше кешкілік лап қойған. Мұздың кептелісінен әрі жаңбыр салдарынан арнасынан шыққан Үбі өзені бірнеше көшенің бойындағы үйлерді басып қалыпты. Кей  жерлерде су деңгейі бір метрге дейін жеткен. Ресми ақпарат 68 үй мен 51 ауланы су басқан деп отыр. Қатты келген мұз аралас су кей шарбақтарды құлатып кеткен. Жергілікті әкімдіктегілер қазір зардап шеккендердің тізімін жасап, оларға көмек көрсету мәселесін қарастырып жатырмыз дейді.

Валерий Фещенко, Жоғарғы Үбі ауылдық аймағының әкімі:

-Жергілікті жерде төтенше жағдай жарияланып отыр. Сондықтан ешкім де назардан тыс қалмайды. Сондай-ақ, жұмыспен қамту орталықтарымен біріге отырып, материалдық көмек көрсету жағы да қарастырылып жатыр. Оның мөлшері кейін белгілі болмақ.

Бірақ, дүние-мүлкінің тоналуынан қауіптенген кейбір тұрғындар ештеңеге қарамастан, су толы үйлеріне оралып, өз беттерінше әрекет етіп жатыр. Құтқарушылар оларға психологиялық көмек көрсетіп, азық-түлік жеткізуде.

Анастасия Скляр, ШҚО ТЖД баспасөз хатшысы:

-Жағдай тұрақталды деп айтуға болады. Кейбір адамдар үйлеріне қайта бастады. Ал өзгелері құтқару бекеттеріне орналастырылды. Тума-туыстарына кеткендері де бар. Құтқарушылар негізінен осы Шемонаиха мен Глубокое аудандарында жұмыс жүргізіп жатыр. Бірақ Қатонқарағай мен Зырян аудандарын да бақылауда ұстап отырмыз.

Қазір судың беті қайтқанымен, төменгі жақта орналасқан 10 үй әлі де суда тұр. Жалпы Шығыс Қазақстан бойынша, құтқару бекеттеріне 100-ге жуық адам орналастырылса, 900-дейін тума-туыстарына кеткен.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!