Былтырдан бері 40 пайызға дейін жеңілдікпен жолдама алғандар алданғандарын жақында біліпті. Өйткені, оларға демалыс үйінің атынан  жолдамаларың жарамсыз деген хаттар келген. Сөйтсе, банкте кепілде тұрған демалыс үйінің бұрынғы қожайыны Акуов меншік құқығынан айрылса да, жолдама сатуды тоқтатпапты. Ал жаңа қожайын 160-қа жуық адамды тегін қабылдай алмайтынын кесіп айтқан.

Алма Әубәкірова, Қарағанды қаласының тұрғыны:

- Құқық қорғау органдарына арызданыңдар деп хат жіберді. Қалай болады, не болатынынын білмейміз біз, осылай алданып қалдық.

Бизнесті қазақша жүргізуді үйрететін кітап жазған Акуовқа алданған бұлар ғана емес. Ол жетекшілік еткен тәуелсіз кәсіпкерлер одағына мүшелікте болғандар оның «супер бизнесіне» миллиондарын салып жіберіп, жер сипап қалды.

Роза Етекбаева, кәсіпкер:

-Өз қолыммен 60 мың доллар салдым. Содан бері пайызын да, пайдасын да көрмедім. Сөзіне сенгенім соншалық, Алматыдағы пәтерімді сатып жіберген болатынмын. Енді екі баламен далада қалдым.   

Сөздің майын тамызатын Акуов демалыс үйінен түсетін пайданы жарнамалаудан шаршамайтын. Нәтижесінде оған құлай сеніп, қаражаттарын санап берген осындай 35 кәсіпкер ақыры одан соқыр тиын көрмеді. Былтыр күзде солардың арызынан кейін, алаяқтық бабы бойынша қылмыстық іс қозғалып, оған іздеу жариаланған еді. Содан осы жылдың наурызында Қарағандыда ұсталған Акуов қазір Алматының тергеу абақтысында қамауда жатыр.

-Енді Акуовтың құрығына қалталылар ғана емес, қараша да іліккені белгілі  болып отыр. Алданған тұрғындар құзырлы органдарға арызданып қойған. Бірақ Қарағандының покуратурасы мен ІІД әзірге істің мән-жайын айтқан жоқ. Олар мәселені жіті тексерген соң ғана мәлімет беріледі дейді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!