Ресейде қамауға алынған қазақстандық 33 жастағы келіншектің алдағы тағдыры не болары әзірге белгісіз. Тергеу амалдары жүріп жатқандықтан, ештеңе болжап айта алмаймыз дейді, еліміздің құзырлы орындары. Бірақ, дипломаттар тергеу абақтысына барып, баласынан безінген анаға консулдық-құқықтық көмек көрсеткен.

Әнуар Жайнақов, ҚР СІМ ресми өкілі:

-Қазақстандық дипломаттар, олар 12-ші сәуір күні ұсталғанға, тергеу изоляторына барып келді. Азаматшамыз қамау жағдайы туралы ешқандай шағым білдірген жоқ.

Юлия Щеглова осыдан бір апта бұрын Мәскеуде тұтқындалды. Ол бұл сапарында 9 айлық ұлын әлдекімге сатпақ болған. Өтеуіне 20 мың доллар сұрапты. Тіпті, безбүйрек ана арам ойын өткен жылдың желтоқсан айынан іске асыруға кірісіп, әлеуметтік желі арқылы хабарлама таратқан екен. Ал, Юлияның бұрынғы енесі Марина Щеглова, дүйім жұртты дүрліктірген оқиғаға қатысты қысқа жауап қайырды.

Марина Щеглова, Юлия  Шеглованың енесі:

-Баладан неге бас тартқанын білмеймін. Қалай болғанда да, немеремді көргім келеді. Рас айтамын.

Юлия Щеглова күйеумен ажырасқандықтан осындай қадам жасады дейтіндер бар. Қиын-қыстау кезде жанынан табылғандар, оның босанған соң қатты күйзеліске түскенін айтады. Тіпті, қаржылық қиыншылық арам іске итермеледі деген болжам жасалуда. Ал, ресейлік сақшылар Мәскеуге аттанып, заңды әкесі екенін дәлелдеген Владимир Щегловқа баланы табыстапты.

-Жаңа түскен мәлімет бойынша, Владимир Щеглов 9 айлық баласымен Алматыға аман-есен жетіпті. Ал, сыртқы істер министрлігінің өкілдері, Ресейдегі елшіліктің қызметкерлері тергеу барысын жіті қадағалап, бақылауда ұстайтынын айтады. Бірақ, баласын саудаға салған қазақстандық азаматшаның жазадан құтылмасы анық. Себебі, оған адам саудалау бабы бойынша қылмыстық іс қозғалған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!