Елуді еңсерген Әбумүтәліп Төлеуовтің онкологиялық орталықта жатқанына сегіз күн болды. Бүгінгі күнге дейін дәрігер атаулыны көрмеген оның өкпесінде қатерлі ісік бары анықталып, таяуда ота жасалды. 30 жылдан астам темекі шегетін Абумұталіп зиянды әдет залалдың туындауына түрткі болғанын айтады.

Әбумүтәліп ТӨЛЕУОВ науқас:

-Өмірі ауырған адам емеспін. Басты себебі  темекі деп ойлаймын. Өкпенің үстінде кішкене ісік болды. Соны алып тастады. Енді темекіден аулақ боламыз. Шекпейміз. 

Жалпы, елімізде жыл сайы өкпе рагына 4 мыңға жуық адам шалдығады екен. Оның 50 пайызы осы аурудың салдарынан көз жұмады. Науқастардың дені кеселді асқындырып алатын көрінеді. Онколог мамандар тұрғындардың скринингтік тексерулерге немқұрайлы қарамау керектігін айтады. Себебі, ауруға ерте диагноз қойылса, ажалдан құтқарып қалу мүмкіндігі зор.

Нұрлан БАЛТАБЕКОВ онколог-дәрігер:

-Кішкентай ісік болса, бір милиметр немесе екі милиметр. Сол кезде ем бастасақ, нәтиже өте жақсы болады. Науқастың өмір сапасы өте жақсы болады. Қиналмайды. Мысалы, рентген көрсетпейді қай жерде кішкентай ісік барын. КТ көрсетеді. 

Сондықтан Қазақстанның бас онкологы өкпе рагы дендеп кеткен облыстарға скринингтік бағдарламаны жүзеге асырмақ. Яғни, өкпенің қатерлі ісігі өршіп тұрған Шығыс пен Солтүстік Қазақстан облысына арнайы ат басын бұрып, жұмысшы мен шылым шегетін адамдарға компьютерлік тамография жүргізу жоспарланған. Себебі, төрт сатыға бөлінетін қауіпті ісік алғашқы екі кезеңде емге көнеді.

Диляра ҚАЙДАРОВА  Қазақ онкология және радиология ғылыми-зерттеу институтының директоры:

-Бұл бастама өкпе рагының алғашқы белгілері бар адамдарды емдеуге мүмкіндік береді. Ең алдымен, Өскемен қаласынан бастамақпыз.Себебі, бұл шаһарда өндіріс орындары көп. Жұмысшыларға тамография жүргізіп, сосын қатерлі ісігі бар адамдарды емдеуге кірісеміз. Егер бастама оң нәтижесін берсе, басқа да облыстарға осы тәжірибені жүзеге асырмақпыз. Басты мақсат - өкпе обырын анықтап, алдын алу. Өлім санын азайту.

Ресми мәліметтерге сүйенсек, өкпеден обыр табылып, опық жейтіндердің көбісі шылымға әуес азаматтар. Тіпті, биыл осы кесел жабысқан қыз-келіншектердің саны төрт пайызға артыпты. Ақ халаттылардың айтуынша, өкпе рагына қарсы күресті салауатты өмір салтын ұстанып, әр адам өзінен бастауы тиіс.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!