Жаңа ескерткіштің орнында бұрын қолын созған Ленин тұрған-ды. Оны бір күнде басқа жерге көшіріп жіберген. Ал қуғын-сүргін және ашаршылық құрбандарына арналған ескерткішті үш ай бойы қоладан құйыпты. Тұғырын гранит тастан қашаған. Ескерткіште басы салбырап, қайғыдан қан жұтқан адам бейнеленген. Бірақ соған қарамастан бар қайратымен адалдығын дәлелдеу үшін темір тікеннің құрсауынан шығуға талпынғаны көрсетіледі. Бұрын ақтөбеліктер 31-ші мамырда қаладан 15 шақырымдай жердегі Түйе төбеге жиналатын. Өйткені халық жауы атанғандарды сол жерде атып көмген. Ал ескерткішті ел қаланың қақ ортасына орнатуды сұрап біраз арызданды. Ол үшін мүсін орнатуға байқау жарияланып, алты бірдей жоба қатыстырылған. Ақыры мүсінші Ахмет Құбайдың туындысы үздік деп танылып, ол үш әріптесімен бірлесіп ескерткішті жасап шыққан.

Жәдігер Кенбай, мүсінші:

-Қаншама қиындық өткенмен де рухының жеңілмегенін көрсететін бір қоладан құйылған адам бейнесі. Ал жоғары жағындағы шаңырақ киелі. Шаңырағы шайқалмай аман шықтық деген сөздің белгісі болып тұр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!