Мұхаммед Салах бастап келген Мысыр командасы мундиальда бір де бір ойында жеңіске жетпестен үйлеріне қайтты. Олар тіпті үшінші ойында арабтарға да ұтылды. Ал перғауын елінің жігіттерін соңғы секундта гол салып 2-1 есебімен жеңген саудиялықтар үш ұпайды қанағат тұтты. Бұл топтан 1 де 8-ге жолдама алған Ресей мен Уругвай командалары. Бірінші және екінші орын үшін болған кездесуде оңтүстік америкалық команда чемпионат  қожайындарын тас талқан етті. Есеп 3-0. Ресей құрамасы ойынды он адаммен аяқтады. Сөйтіп Суарес, Кавани бастаған жігіттер тоғыз ұпаймен бірінші, ресей алты ұпаймен екінші болып топтан шықты. Ал Б тобының екі ойыны да тең нәтижемен аяқталды. Әлем чемпиондары Испания Марокканы ұта алмады. Еуропаның мықтыларын сенсациялық жеңілістен құтқарған тоқсаныншы минуттағы Яго Аспастың голы. Есеп 2-2. Португалия да Иранды ұта алмады. Криштиано 11 метрлік нүктеден мүлт кетті. Бұл ойында есеп 1-1. Бұл топта Марокко мен Иран үйлеріне қайтса, Испания мен Португалия төрт ұпаймен келесі айналымға жолдама алды. Енді Испания 1 де 8-де Ресеймен, ал Португалия Уругваймен кездеседі. Айта кетейік, Ресейде өтіп жатқан әлем біріншілігінің жеңімпазы 15 шілдеде белгілі болады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!