Астаналық Кәмила Серғалиева үш жасар ұлы Нәбиді балабақшаға апарудан қорқып қалған. Тілі енді шыққан балақай тәрбиешіден қалай таяқ жегенін ымдап қана көрсетеді.

- Покажи что Жадыра, воспитательница делала тебе. Покажи как она делала. По голове била? Вот так вот била да?

Балабақшада не жағдай болып жатқаны бақылау камерасына түсіп қалыпты. Тәрбиеші болса, төбеден түсіріп тұр-ау деп шімірікпейді. Түскі астан кейін ұйықтап жатқан балақайлардың бірін жолай ұрып, екіншісін түрткілеп, шапалақтың көмегімен қатаң тәртіп орнатып жүр. Камила оны баласынан біліпті.

Камила Серғалиева:

- Сағат түскі 12 жарым кезінде баламды үйге алып кетейін деп бардым. Өйткені, тәрбиешіміз еңбек демалысына шығып кеткен. Жаңа тәрбиешіні жатырқап жүрер деп. Балабақшаға барсам, ұлым жылай береді. Үйге келгеннен кейін қалай ұрғанын, құлағынан жұлқылағанын сұрап білдім.  

Видеоның басты кейіпкері Жадыра Ермекбаева өткен желтоқсан айында тәрбиешінің көмекшісі болып қабылданған екен. Шілде айында тәрбиеші штатына өткен. Қазір ол қан қысымы көтеріліп, үйінде жатыр. Кінәсін мойындамайды.

Жадыра Ермекбаева, тәрбиеші:

- Я хотела просто балаларды ұйықтатуға, и она все это придумала и говорит то что я якобы бил их. Там конкретно ничего не видно. Это суд решит все вопросы. Я болею. Мне плохо, у меня давление поднялось.

Дау болған №84 балабақша – осыдан 3 жыл бұрын «ақылды үй» жобасымен салынған Астанадағы ерекше ғимараттардың бірі. Содан бері ата-аналардан бірде-бірінен шағым болмапты.

Динара Базарбай, №84 «Кәусар» балабақшасының меңгерушісі:

- Ол тәрбиешінің көмекшісі болып жүрген кезде оның үстінен ешқандай ата-аналардан шағым, балаға дауыс көтерді, ұрды деген сияқты болған емес. Барлық құжаттары бойынша біз оны қабылдадық. Барлық арнайы емханалардан психикалық, физикалық жағдайы туралы барлық құжаттары бар.

Деесе де, басшылық шу шыққан соң Жадыра Ермекбаеваны жұмыстан шығарды. Сондай-ақ, оны жұмысқа қабылдаған балабақша әдіскеріне қатаң сөгіс жарияланып, меңгерушіге қалалық білім басқармасы ескерту жасаған. Ал үш жасар Нәбидің анасы тәрбиешінің үстінен полицияға арыз түсіріпті. Полиция бүгінде тәрбиешіден жауап алып, тексеру жүргізіп жатыр. Соңғы сөз енді сотта айтылады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!