«Жас қалам» жобасының журналистка саласына қызыққан кез келген өренге есігі ашық. Аймақтық форум аясында еліміздегі танымал журналистер арнайы шеберлік сабағын өткізеді. Ал, тілшілік қызметтің қыр-сырын үйрететін медиа-мамандар,  қалам мен микрафонды таңдаған жастар көп жағдайда тәжірибеден ақсайтынын жеткізді.

Срайыл Смайыл, «КТК» телеарнасы мемлекеттік тілде хабар тарату бас редакторы:

-Теориялық журналистика мен практикалық журналистиканы байланыстырудың мәні өте зор.  Яғни, оқып жатқан, білім алып жатқан журналистер осы бастан университет қабырғасында жүріп алып, өзінің алып жатқан теориясын практикалық машықпен байланыстыра білу керек.

Дина Төлепберген, тележүргізуші:

-Әсіресе телевизияға келген кезде олардың біздің іске жарамсыздығын байқап көріп жатамыз. Бұл семинар-тренингтер осы іс-тәжірибені қалай жүргізуге болатындығы жөнінде көптен көп мағлұмат береді деп ойлаймын.

Бұған дейін аймақтық форум Тараз қаласынан бастау алған еді. «Журналистің арқалағаны  алтын, жегені  жантақ» деген тәмсілге тез көндігеміз деген ынталы топтың қарасы көп. Барлығы 14 пен 29 аралығындағы жастар. Әуелгі іріктеу кезеңінен кейін аймақтық жиында дәріс тыңдайтын олар, соңында республикалық форумда бас қосады.

Жансая Қожамқұл, студент:

-Қандай дүниелер десеңіздер, қазіргі таңдағы журналистика саласының қалай дамып жатқаны және журналистика саласының кемшілігі туралы айтылып жатыр. Біз болашақта кем тұстарын түзеуге тырысып, артымызда келе жатқан жас буынға барынша үлгі болуға тырысамыз.

«Жас қалам» жобасы аясында 500-ге жуық жас тілшінің шеберлігін шыңдау көзделген. Форумның жалғасы алдағы  уақытта Семей және Астана қаласында өткізіледі.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!