Испания Қазақстанның ірі экономикалық серіктестерінің бірі.

Соңғы он жылда елімізге 200 миллион доллардан астам қыруар инвестиция құйған. Бұл көрсеткіш енді әлдеқайда артуы мүмкін. Өйткені, екі ел экономикалық байланысты бұдан да нығайту үшін маңызды үш келісімге қол қойды.

Меморандум іске асса, қазақ-испан бизнесмендері кәсібін бірлесіп жүргізбек. Әсіресе, машина құрастыру, телекоммуникация, энергетика, ауылшаруашылығы саласына ерекше мән беріліп отыр.

Айдар Әріпханов,  «Бәйтерек ҰБХ» АҚ Басқарма төрағасы, Іскерлік кеңесінің тең төрағасы:

-  Қазақстан мен Испания арасындағы тауар айналым 1 млрд 700 миллион доллар шамасында. Оның негізгісі мұнай мен газға тиесілі. Сондықтан тек шикізат саудасын ғана емес, өзге саладағы алыс-берісті де арттырғымыз келеді.

Бірақ ол үшін инвестиция қажет. Сондықтан «Бәйтерек» холдингі іскерлік кеңесінің отырысын ұйымастырып қана қоймай, елімізде инвесторларға барынша қолайлы жағдай жасалғанын түсіндірді. Мұны корольдіктен келген бизнесмендер де жақсы білетін сияқты. Қазақстанға қаржы құйып, пайда табуды көздеп отыр.

Ксиана Мендес, Испанияның сауда жөніндегі мемлекеттік хатшысы, Үкіметаралық комиссиясының тең төрағасы:

-Біз кез-келген салада Қазақстанмен бірлесіп жұмыс істеуге дайынбыз. Әсіресе инфрақұрылым, туризм, тау-кен өндірісімен айналысатын компаниялар инвестиция тартуға дайын.

Осымен бес рет өткен кеңеске 40 испандық, 60 отандық ірі компания өкілдері қатысты. Нәтижесінде келісілген келісімдер жетерлік. Мәселен, испандық инвестордың бірі Қазақстанда қоқыс өңдейтін зауыт салуға ниет білдірді. Енді бұл жоба жақында қолға алынбақ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!