Төраға валюта секторындағы тұрақсыздықтан қаймығып қалған жұрт қаражаттарына алтын алуға жұмсап жатқанын айтты. Бұл сары металл құнын ешқашан жоғалтқан емес. Биыл 10,20,50,100 граммдық құймалар сатылымға шығарылып, екінші деңгейдегі банктер жалпы салмағы 175 келі алтын сатыпты. «Жоспарлаған алтынды саттық» деп қуана айтқан Данияр Ақышев болашақта 12-13 келілік алтын құймаларды саудаға шығаруды ойластырып отыр. Ал теңгенің тағдырына қатысты Ұлттық банк әдеттегідей оптимистік пікірде. Айтуынша, АҚШ-тың Ресейге салынатын кезекті санкциясы теңгені теңселтпейді. Себебі, рубльге қарағанда төл ақшаға өзге де сыртқы факторлар әсер етеді. Ол - мұнай бағасы, сауда-саттық серіктес елдердің валюта бағамы. Ал осы ретте мұнай баррелі бір екпінмен өсіп келе жатқанын айта кетейік.