Ашынған туристер «Қорғас» кеденшілерінің былығын жайып салды
Туристердің құқығы тапталды! «Қорғас» халықаралық сауда орталығына барған саяхатшылар кеден қызметкерлерін кінәлап отыр. Туристік компаниялармен келісім-шартқа отырып, еліміздің түкпір-түкпірінен ағылатын жұрт ұзын-сонар кезекте тұруға мәжбүр. Себебі, кеденшілер туристік топтарға арналған өткелден ақша төлеген кез-келген адамды кіргізіп, пайда табудың жолын тапқан дейді олар.
Автор: Cымбат Ғалымбекұлы
22.10.2018
Сапырылысқан халық. Иін терескен кезек. "Қорғас" халықаралық сауда орталығында күнде осындай қарбалас.
-Кептеліс таңалакеуімнен басталады. Ал ұзын-сонар кезекте тұрғысы келмегендер мына жасыл дәлізден емін-еркін өтіп жүр. Алайда бұл өткел туристік компаниялардың атынан келген адамдарға ғана арналған.
Кедендегі келеңсіздік мыңдаған шақырымды артқа тастап, «Қорғасқа» қыдырып, керек-жарағын алуға келген туристердің ашуын туғызды.
Аида Бешенова, турист:
-Егер біз туристер әрең өтсек, бұл дәліздің не қажеті бар? Не үшін ақша төлеп, туристік компаниялармен келеміз. Түсінбеймін.
Тәртіп бойынша туристік топтар өтетін аймаққа саудагерлер аттап баспауы қажет. Дегенмен, құлқынның қамын ойлағандар бұл заңды пысқырмайды дейді жұрт. Бұған біздің түсірілім тобы да көз жеткізді.Есікті-ашып жауып тұрған кеден қызметкерлері сіздің қайдан келгеніңізді де сұрап бас қатырмайды. Қолына 1000 теңге ұстатсаңыз болғаны. Есесіне, бармақ басты, көз қысты әрекеттерден саяхатшылар кедергіге тап болып, кезекте сағаттап тұруға мәжбүр.
Алмагүл Жылқыбаева, туристік компанияның басшысы:
-34 адам келген. Оның бес адамы кетіп қалды. Олар мына жерде де бес сағаттап тұрамыз дейді. Осы жағдайдан кейін қайдан турист тартамыз?
Ал туристердің кіріп-шығуына жауап беретін менеджер «сасқан үйрек, артымен жүзедінің» кебін киді. Ең алдымен, ақша алғандарды танымаймын деп ат тонын ала қашса, артынан ол ережені білмейтін жаңа қызметкер болуы мүмкін деп шатасты.
Мехрибан Хасанова, «Қорғас» Шекара маңы ынтымақтастығы халықаралық орталығы" АҚ менеджері:
-Мен бұл жағдайды байқамай қалдым. Біз жаңа қызметкерлерді жұмысқа алғанбыз. Солар ақша алған шығар. Сендерге нақты ештеңе айта алмаймын.
Қытаймен арада көпір болған еркін экономикалық аймақтың басшысы бұл жағдайды кездейсоқтыққа балады. Ол кеденде туристерге барлық жағдай жасалған деп ағынан жарылды.
Қаһарман Жазин, «Қорғас» Шекара маңы ынтымақтастығы халықаралы орталығы" АҚ президенті:
-Бұл мәселені реттейміз. Кінәлі қызметкерлер тиісті жазасын алады. Қажет болса, жұмыстан шығарамыз. Біз заң аясында ғана жұмыс істейміз. Туристерді тек тізіммен кіргіземіз.
Әйтсе де, кеденшілерде арнайы тізімнің болмауы көңілге күдік ұялатады. Енді туристердің Қорғастағы түйткіл шешімін таппайынша, халықаралық орталыққа кіріп-шығудың азабын тарта беретін түрі бар.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
