«Хэллоуин» деп мейрамды тойлап қиқулағандарға түнгі клубтың тосынсыйы осы болды. Мумия кейпіндегі тірі адамды арқанға асып көтерді.  Каскадерлік желет, сақтандыру белдігі болғандықтан қасындағылар да алаңсыз болғандай. Бірақ 15 минуттан кейін Қасым Жұмағожинді жерге түсіргенде ол әлсіреп, талықсып қалған көрінеді.

Жедел жәрдем бригадасы жетіп, алғашқы көмек көрсетілгенімен, Қасым бақилыққа аттанды. Әлеуметтік желіде әріптестері мен туыстары оны инфаркттен қайтыс болғанын хабарлады деген ақпарат таралды. Бірақ Сот сараптамалар институты ондай мәліметтің ауыздарынан шықпағанын айтады.

Алтынай Бабықпаева, Алматы қаласы бойынша Сот сараптамалар институты директорының орынбасары:

-Жұмағожинге қатысты сот сараптамасы үшінші қарашада басталды. Заңда көрсетілген нормаға сәйкес қорытынды сараптама 30 күн бойына жүргізіледі. Сәйкесінше, қорытынды бір айдан кейін дайын болады.

Ішкі істер департаменті де сараптама қорытындысы шықпайынша, жақ ашпай отыр. Көпшілік көңілінде Қасымның өліміне қатысты біраз күдіктің қалғаны рас. Алайда әріптестері оның осы трюк көрсеткен соң сәлден кейін қайтыс болғанын алға тартып отыр. 

Евгения Ли, Nomad Stunts тобының байланыс бойынша менеджері:

-Ол өзінің әріптесіне бәрі жақсы деп екі рет белгі берген. Оған дейін де сынақ жасағанда бәрі дұрыс болған. Қасымның денсаулығы мығым еді. Білуімше, бір жерім ауырады деп ешкімге шағымданбаған.

Қасым Жұмағожин отандық және голливудтық фильмдердің жарқын жұлдызы еді. Еңбек жолы 2005 жылы «Көшпенділер» туындысынан басталды. Атағы жер жаратын Арнольд Шварценеггер, Киану Ривз, Сильвестр Сталлоне секілді актерлер орындай алмаған қиын трюктерді жасаған. Nomad Stunts құрылғалы соның құрамында болды.  Бұл Қасым соңғы рет өнер көрсеткен, Хэллоуинді тойлаған дәл сол түнгі клуб. Ақырғы сомдаған рөлі Мумия болды. Шоу үшін адамдардың үстінде асылған азаматтың артынша о дүниеге аттанарын кім білген...

-Қасым Жұмағожин бүгін жер қойнына тапсырылды. Небәрі 34 жастағы азаматтың жұлдызы жалп етіп ерте өшті. Ажалының неден келгенін айтатын сарапатама қорытындысы бір айдан кейін дайын болады. Ал әзірге Қасымның жақындары әлеуметтік желіде желдей ескен жалған ақпаратқа сенбеуге, бәзбіреулерге көз жетпей жатып нақақтан-нақақ күйе жақпауға шақырады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!