Халықаралық Олимпиада комитеті қоланы Әлем чемпионаты өтіп жатқан Ашхабадқа арнайы әкелді. Спортшымыз жүрген жарысты орта жолдан тоқтатып қойып, мінберге шықты. Сөйтіп, сонау екі жыл бұрын басқалардың мойнында кеткен медальді нағыз иесіне табыстады.        

- Алақай! Көптен күткен қуаныш!

Денис Ұланов Риода 390 келі салмақты көтеріп, үшінші орынға лайықты делінген болатын. Алайда, төрешілер ұпайы тең болса да, румындық спотшының өнерін жоғары бағалап, қола жүлдені соның пайдасына шешкен еді. Бірақ, көп ұзамай Габриэль Синкраян допингпен ұсталды. Ұйымдастырушылар да қателіктің кеткенін мойындап, Ұлановқа медальді бермек болған. Бірақ та, румындықтар жүлдені қайтарғысы келмей, соттасып жүріп алыпты. 

Жігер Әзбергенов, ҚР Ұлттық Олимпиадалық комитетінің ресми өкілі:

-Неге осылай екі жыл уақыт өтті дейтін болсақ, румындар  шешімге қарсылық танытып, соттасқан болатын. Дегенмен де міне, тиісті медаль өзінің қожайынын тауып отыр.

Екі жыл дегенде әділдіктің орнағанына бәрінен бұрын бапкері қуанған. 

Спортшыдан кешірім сұрағандай болған Олимпиада Комитеті еліміздің көк туына да лайықты құрмет көрсетті. Әуен аяқталғанша, аяқтан тік құрып, жеңімпазды қошеметке бөледі. Сонымен, атлеттеріміз Олимпиададан ел қоржынына салған бұл 6-шы медаль. Барлығы, Риоға 8 зілтемірші аттанған болатын. Ал қолаға қолы кеш жеткен жүлдегерге тиесілі сыйақысы беріле ме, жоқ па ол жағы әзірге белгісіз. Ұлттық Олимпиада комитетіндегілер де, федерациядағылар да ол жөнінде тіс жармай отыр. Тек «Үкімет деңгейінде шешілетін мәселе» деп жылы жауып қоя салды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!