Петропавлдық Шаяхметовтер отбасы осы күндері зор қуаныш әсерінде жүр. «Нұрлы жер» бағдарламасы арқылы айдың басында ата-әже, екі баласымен бірге осы екі бөлмелі пәтерге қол жеткізген. 2013 жылдан бері аңсап күткен баспанасына енді айына 43 мың теңге төлеп тұрып жатыр.

Тамаша Шаяхметова, Петропавл қаласының тұрғыны:

-Бұрында біз ата-анамызбен бірге тұрғанбыз. Жер үйде тұрдық. Су тасу керек болды. Пеш жағу керек болды. 5 жыл кезекте тұрдық. Пәтер алғанымызға қуаныштымын.

Бағдарлама арқасында Петропавлда осындай 400-ден астам пәтері бар 4 үй тұрғызылған. Оның бәрі тұрғындарға, әсіресе, жағдайы төмен отбасыларға жақсы мүмкіндік. Жалпы «Бәйтерек» холдингі тұрғынүй бағдарламаларын жүзеге асыра бастағалы бері 82 мың адам пәтерлі болды десек, соның 18 мыңы кейін сатып алатын жалдамалы үйлер.

Әнуар Омарқожаев, «Бәйтерек» Ұлттық басқарушы холдингі» АҚ басқарма төрағасының орынбасары:

-4 жыл ішінде 1 миллион 600 мың шаршы метр үй салынды. Ал былтырдан бастап құрылысты тікелей қаржыландырмай, әкімдіктердің құнды қағаздарын сатып алу арқылы қаржыландырып жатырмыз. Оған кеткен шығынды екі жылда қайтарып алып, басқа құрылыстарға жұмсаймыз.

Яғни құрылысқа одан басқа ақша бөлінбейді. Елбасы Жолдауында әрбір қазақстандықты 30 шаршы метр баспанамен қамтамасыз етіп, Біріккен ұлттар ұйымының стандартына жеткізу жөнінде тапсырма жүктеген еді. Холдинг соны орындауға белсенді қатысып келеді. Бүгінде ол көрсеткіш елдегі адам басына 21 шаршы метрден тиеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!