Қытайдан жүк тасимын деп шырғалаңға ұрынған 38 көлік иесінің бірі  Христофор Косов. Көлікті анасының үйін сатып алғанын айтқан ол 2015 жылдың маусымында алғаш рет жолға шығыпты. Сол кезде барлығы артылған жүкті Қазақстан арқылы Қырғызстанға жеткізуі тиіс болған.

Хрситофор Косов, көлік жүргізушісі:

-Кеденге келгенімізде Қытай жағынан, Қорғас бекетінде де кедергі болған жоқ. Құжаттың бәрі дұрыс. Тіпті, көлігімізді рентгеннен өткіздік. Қазақстаннан Қырғызтанға өтетін Қарасу бекетінде де бәрі жақсы болған. Тек жүргелі тұрғанымызда кеденшілер тағы келіп, бізде контрабандалық тауар бар екенін айтты.

Содан сергелдеңге ұшырап, көліктерімізді қамауға алды деген жүргізушілер, қазір шаруасының шатқаяқтап кеткенін айтады. 

Тәңірберген Қожағелдиев, көлік жүргізушісі:

-Бұл машинаның арқасында мен отбасымды бағып отырмын. Қазір не жұмыс жоқ. Не машинаны сата алмаймыз, не машинамен жұмыс істей алмаймыз. Бұл әрең дегенде қолымыз жеткен машина болатын.

Дегенмен, құзырлы орган өкілдері контрабандалық тауар тасымалы бойынша 1 адамның сотталғанын айтады. Ал, жүк көліктері қылмыстық істе айғақ зат есебінде тіркелген.   

Динара Қыдыралиева, Жамбыл облысы бойынша соттар әкімшісінің ақпараттық қамтамасыз ету бөлімінің басшысы:

-Фураларға қатысты айғақ зат ретінде үкімде көрсетілген. Үкім бойынша мемлекеттің пайдасына тәркіленді. Соттың үкімін басқа орган орындайды. Ол Жамбыл облысы бойынша әділет департаменті.

Ал, көлік иелерінің адвокатына салсақ, жүргізушілер тек тауарды аман-есен жеткізуге ғана жауапты. Ол жүк тасымалдаушылардың көлігінен айырылып қана қоймай, қара тізімге де енгізілгенін айтады.

Елжас Молдақашев, адвокат:

-Шағым айтып бармаған жеріміз жоқ. Апелляциялық сот, Жоғарғы сот және Бас прокуратураға дейін бардық. Еш өзгеріс жоқ. Куәгерлердің көлігін қалай қылмысқа қатысы бар деп айта аламыз. 

Жүк тасымалдаушылардың айтуынша, қылмыс құралы ретінде танылған көліктер кез келген уақытта тәркіленіп, мемлекет кірісіне берілуі мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!