Алинаның ауруы алғаш рет 1 жарым жасында буындары сырқырап, белгі берген. 3 жасқа жеткенде ауруханаға жатып, осы дертпен күресе бастайды. Осы ағзасының өсуі де нашарлаған. Аптасына бір рет сыртқа шығып келгені болмаса, көп жүрмейді де.

-Таңда оянғанда қатты ауырады. Орнымнан тұр алмай қалам. Қатты жаныма батады.

Соңғы уақытта денсаулығына кері әсер еткен соң, дәрігерлердің жазып берген гормондарын да ішуді тоқтатыпты. Ал ақ халаттылардың жазып берген «иларис» деген препараты Қазақстанда тіркелмеген. Оны шетелден сатып алуға шама келмейді. Бір ампуласының құны 6 миллион теңгеден асып жығылады. Қалиевтардың отбасында ондай ақша жоқ.

Татьяна Қалиева, Алинаның анасы:

-Қызыма екі жылдан астам уақыт бойы ем жасалған жоқ. Диагнозы да дәл қойылған жоқ. Бізге жазып берген дәрісі нақты керек дәрі ме, оны да білмейміз. Сатып алған күннің өзінде әсері күшті болғандықтан оны салуға да қорқып отырмыз.

Алинаның қиын жағдайы туралы осыдан бір жыл бұрын айтқанбыз. Содан бері тырп еткен бір жер жоқ. Ата-анасының айтуынша, денсаулық сақтау министрлігі тұшымды жауап бермеген. Ал министрлік сырқаттың бұл түрін тегін медициналық көмек тізіміне кіргізуді енді ғана ойластырып жатыр. Әзірге жергілікті әкімдіктеріне жүгінсін дейді.

Людмила Бұйрабекова, ДСМ Фармация комитетінің төрайымы:

-Жергілікті атқарушы органдардың құзіреті бар. Олар жергілікті мәслихат арқылы ақша бөле алады. Сосын денсаулық сақтау басқармасы бізге өтінішпен шығып, науқастарды дәрімен қамтамасыз ете алады.

Қазақстанда осындай дертке шалдыққан 4 қыз болған еді. Солардың бірі дертіне дауа таппай жақында Семейде көз жұмды. Қалғандары Қарағанды мен Қостанайда тұрады. Барлығы да мектеп жасында.

Дегенмен Алинаға бірінші керегі дәрі емес. Оның ауруын дәл анықтап беретін клиниканы ата-анасы Италиядан тауыпты. Ал оған диагноз тұрмақ, барып келудің өзіне он мың еуро керек. Сондықтан Қалиевтар мемлекеттің көмегіне мұқтаж.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!