Боранды күні наразылық білдіргендердің мұңы бір. Тіпті екі жылдан аса нәпақасын айырып келген комбинатқа кіре алмай, тесігінен сығалап қалды. Өйткені қаржылық қиындықтарға байланысты құрылыс материалдарын шығаратын зауыт уақытша жұмысын тоқтатқан. Енді үш айдан бері жалақылары қолына тимей, өздері жұмыссыз босып кеткен. 

Жангелді Әшімхан, жұмысшы:

- Бізге тамақ ішу керек. Пәтерақымды төлеу керек. Кредиттің өсімақысы күн сайын көбейіп жатыр. Уәдеге тойдырып болды.

Қарызға белшеден батқан  жұмысшылар саны 600-ден асып жығылады. Барлығы мына зауытта тұрғын үй қабырғасын осылай дайын күйінде шығарумен айналысқан. Екі жарым жыл бұрын іске қосылған комбинатты Елбасының өзі ашып берген еді. Енді мақтауы асырылған кәсіпорын жұмысшыларының ақшасын дер кезінде төлемей дауға қалып жатыр.

Қазыбай Сембайұлы, жұмысшы:

- Үш күн істеп, үш күн демаламыз. Төрт ауысым болған. Бір сменада 45 адамдай істедік. Бірақ, өкінішке қарай жұмысшылардың біразы жұмыстан шығып кетті. Отбасын асыру керек қой.

Ал өздері де жалақы алмағанын айтқан зауыт басшылығы кінә бізден емес дейді. Олардың айтуынша, комбинат «Шар құрылыс» дейтін компанияға тиесілі. Құрылтайшы фирмадан тапсырыс не ақша түспеген соң, осындай жағдайға тап болдық дейді.

Максим Передреев, Үй құрылысы комбинатының атқарушы директоры:

- Қазір құрылыс саласында біраз қиыншылықтар болып жатыр. Тапсырыс беруші компаниядан ақша күтіп отырмыз. Олар да әне-міне береміз деп бізді сендіріп отыр. Қаржы түскен бойда жұмысшыларға жалақы беріліп, өндіріс орны қайтадан іске қосылады.

Осылайша, жұмысшыларын жалақысыз қалдырған мақтаулы компания басшылары бүгін тағы кезекті уәдемен құтылды. Олардың айтуынша, қызметкерлеріне екі күннен кейін маңдай тер ақылары беріледі. Бірақ айлап айлық көрмегендердің бұған сенімінен гөрі күдігі басым.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!