Кезекті тырысқа келген депутаттардың мереке алдындағы көңіл-күйі көтеріңкі. Бірақ Қаржы министрі Әлихан Смайыловтың Қытайдың Экспорттық-импорттық банкінен 100 миллиард теңге несие алғалы жатқанын айтқаны сол еді, мәжілісмендер қабақ шыта қойды.

Анар Жайылғанова, Мәжіліс депутаты:

- Кейінгі кезде Үкімет сырттан қарыз алу тәжірбиесі тұрақты түрде ұстанып келе жатыр. Сондай-ақ, сырттан алынған қаражаттар көп жағдайда ұтымды пайдаланбайтындығы туралы айтылған. Осыған байланысты осы жобаны өзіміздің бюджет есебінен іске асыруға болады деген ой туындайды.

«Депутаттар алмақтың да салмағы бар», - дейді. Алайда Әлихан Смайыловтың жауабы дайын. Үкімет кеден бекеттерін қалпына келтіру жобасын қазынадан қаржыландыруға қауқарлы. Бірақ осынша ақшаны бірден берсе, бюджетке артық салмақ түседі. Сондықтан министр несиені 2 пайыздық мөлшермен 20 жылға Қытайдан алған  жөн деп отыр.

Әлихан Смаилов, ҚР Қаржы министрі:

- Өзге қаржы ұйымдары жылына 3,4 пайыздық мөлшерлемемен оның үстіне доллармен беруге келісіп отыр. Ал, біз юаньмен аламыз. Мұның тиімді жағы бар. Соңғы үш жылда біздің ұлттық валюта 10 пайызға, юань 5 пайызға әлсіреді. Демек, бұл жерде доллармен алғаннан гөрі юаньмен алған бюджетке түсетін ауыртпалықты анағұрлым азайтады. 

Әлихан Смайылов көрші ел беретін 2 миллиард юаньға Қытай, Түркіменстан және Өзбекстанмен шекарадағы 10 кеден өткізу  бекетін жөндемек. Оның 9-ы автомобиль және біреуі темір жол бекеті. Бұл ретте депутаттар былтыр Алматы облысындағы бір ғана «Нұр жолы» бекетіне 70 миллиард теңге берген министрдің ісін сынады.

Серік Сейдуманов, Мәжіліс депутаты:

- 100 млрд теңгеге 10 өткізу бекетін жөндеп техникамен жабдықтамақсыз ба? Мәселен, Алматы облысындағы «Нұр жолы» бекетіне 70 млрд теңге жұмсайсыз? Неге мұндай айырмашылық шығып тұр? Қаржыны жеткізе аламын деп ойлайсыз ба?

Министр жауапты  қысқа қайырды. Оның айтуынша, «Нұр жолы» өткізу бекеті Орталық Азиядағы ең үлкен нысан. Оған қыруар қаржы бөлінуі де  сондықтан. Десек те, көп күмәнданған мәжілісмендер соңында Қытайдан қарыз алу туралы келісімді бірауыздан бекітіп берді.

Ал қарызға алынатын 100 миллиард теңгенің 70 пайызына қытайлық құрылғылар алынса, қалған 30 пайызы кеден бекеттерін жөндеу жұмыстарына жұмсалады. Министрдің айтуынша, Қытайға бұл несиеден бөлек берешегіміз жоқ. Тек кепілдендірілген қарыз бар. Көлемі 1 миллиард 200 миллион доллар. Бұл қаржы  бірнеше облыс пен бас қаланың  шұрық-тесік жолдарын жөндеуге жұмсалыпты.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!