Фильм түсіру арманын орындау үшін Әсел Сәдуақасовамен жолықпақ болған Қанат, кірер есіктен қателеседі. Криминалды топтың келіссөздеріне түсіп қалған жас режиссер, жаңа жобасын қылмыстық топтың талабы бойынша өрбітуінен басқа амалы қалмайды. Ал, қиын кезде қолдау білдіргісі келген аңғал досы, өзінің қандай ұсынысқа келісім бергенінен бейхабар. Осылайша, жанры бөлек туындыға түсірілім тобы өзгеше көзқараспен қарауға тырысқан екен.

Асан Мәжит, актер:

- Сценарий бөлек, яғни жанр бөлек мұнда. Комедия болғанымен, яғни басқаша тұрғыда мұнда режиссер де, сценарист те және актерлар да бұл киноға басқаша ракурстан қарауға тырысты деп білемін. Сондықтан да, бір бұрын соңды болмаған жоба болады деген үміттемін.

Қылмыстық сахналары көп болғандықтан түсірілім кезінде 10 литрге жуық жасанды қан төгілген. Бұл бір фильм үшін өте көп дейді топ мүшелері. Сол секілді, жеңіл киінген актерларға қысқы мезгіл де берілген рөлді сомдау оңайға соқпаса, каскадерлер да тәулік бойы бір кадрдың сәтті шығуы үшін тер төккен.

Әсел Сәдуақасова, продюсер:

- Фильмнің басында мен қылышпен айқасамын. Мұндай сахнаны түсіру өте қиын. Мен барлық каскадерлерге алғыс айтқым келеді. Себебі, бар болғаны 40 секундтың өзін біз дамылсыз бір тәулік түсірдік. Негізінен бір сахнада 3-4 кадр болады. Ал, мұнда біз 63 кадр жасадық. Бұл дегеніңіз өте көп.  

Берілген рөлдерін сәтті ойнап шыққан актерлар кино соңында ерекше ықыласқа бөленді. Фильмнің тұсаукесеріне келген қонақтардың басым бөлігі комедиялық жанры басым екендігін алға тартып, 21-ші наурыздан бастап қалың көрерменге жол тартатын туынды көптің көңілінен шығатындығына сенім білдірді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!