Белгіленген уақыттан бірнеше сағат бұрын Құрманғазы атындағы мәдениет сарайына жиналған жас әншілер сахнаға шыққан сәтте сүрінбес үшін дайындықтарын қайта-қайта пысықтап әлек. Олардың арасында төртінші рет өткізіліп отырған жобаға бірнеше рет қатысып, тауы шағылса да тағы келгендері, алғаш рет қатысып жатқандары да бар.

Шырайлым Аралбай, байқауға қатысушы:

- Мен осы бала даусын инстаграмнан көріп, өзімді сынауға келдім. Барлық қатысушыларға сәттілік, ал өзіме жеңіс тілеймін!

Бұл жолы байқаудың үздігі атанудан үміткер болып келгендердің саны 130-ға жуық. Ал, жерлестерінің арасынан мықтыларды анықтауға Атырауға белгілі әнші Динара Сұлтан арнайы келіпті. Ол керемет дауыс иесіне байқаудың ақтық кезеңіне өз өңірі атынан қатысуға мүмкіндік беретін жолдаманы табыстамақ.

Динара Сұлтан, әнші:

- Бізге де үлкен жауапкершілік. Себебі, бір бала таңдаймыз, ең бастысы әртіс болуы керек, даусы және сахнада өзін еркін ұстауы керек.

Ұйымдастырушылардың айтуынша, биылғы байқаудың ерекшелігі – балалар тыңдалымға ата-аналарымен қатысуда. Бұл өз кезегінде жұлдызды доданың әділ, шынайы өтетіндігіне мүмкіндік береді екен.

Толғанай Хасен, «Бала дауысы» байқауы жобасының жетекшісі:

- Атырау облысының дайын әртістері екендігіне сенімдіміз. Себебі біздің алдыңғы жылдардағы финалистеріміз өздерінің өнерлерімен тамсандырды, таңғалдырды. 

Жобаны Тұңғыш Президент және Әлия Назарбаеваның «Жандану әлемі» қорлары өткізуде. Республиканың түкпір-түкпірінен балаларды сайысқа іріктеу 22-ші мамырға дейін жалғасады. Ал жоба жеңімпазы Диснейлендке жолдама немесе Қазақстанның музыкалық бағыттағы кез-келген жоғары оқу орнында ақысыз оқитын болады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!