Бұл байқау жырақтағы жеткіншектер үшін бола бермеймін мүмкіндік. Бағын сынауға шалғайдағы ауыл балалары көптеп келген. Қатысушылардың қобалжып тұрғандары айтпаса да түсінікті. Көбі бұған дейін білікті мамандардың алдында шырқап көрмеген. Сол себепті соңғы дайындықтарын мұқият пысықтап жатыр. 

Ал залда шыбынның ызыңы естілмейді. Әрбір үміткер реттік нөмірмен жайғасып, кезегін күтіп отырады. Бұл іріктеудің ерекшелігі сол, қатысушы музыкалық сүймелдеусіз, жанды дауыста ән айтуы тиіс.  Ән байқауына жалпы саны 100-ден аса үміткер қатысты. Ұйымдастырушылар өнерлі жастардың көптігіне таң қалып отыр. Сондықтан таңдау жасау да оңайға соққан жоқ. 

Толғанай Хасен, «Бала дауысы» ұлттық ән байқауының ұйымдастырушы мүшесі:

- Осы жүзден астам баланың ішінен бір ғана жеңімпаз таңдап, біз Алматыға, яғни жұлдызды арман үйіне алып кетеміз. Олар хореография, вокалдан сабақ алып, байқаудың финалына дайындалады.  

Ақтық сайыста 17 үміткер бақ сынасады. Талантымен топ жарғанға музыкалық оқу орнының гранты мен Диснейлендке жолдама беріледі. Ауқымды жобаның бас жүлдесіне Петропавлдан 9 жасар Дана Бәскенованың таласуға мүмкіндігі бар. Осы қаршадай қыз бүгін жүзден жүйрік шықты.  

Дана Бәскенова, Байқау финалисті:

- Өте қуаныштымын. Бұл сәтті ұзақ күткен едім. 

Бірегей жоба осымен 4 мәрте өткізіліп отыр. Бұл жолы 10-шы өңірдің жеңімпазы анықталды. Айта кетейік, ұйымдастырған Әлия Назарбаеваның «Жандану әлемі» мен Тұңғыш Президент қорлары.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!