Ғалымжан Мамытбек елге белгілі профессорлардың бірі. Ойы ұшқыр ғалымды «Қазатомөнеркәсіптің» өзі қалап, қоярда қоймай жұмысқа алған. Бас көтермей, тек зерттеумен айналысқан ол күтпеген жерден ұры деп танылып, 8 жылға сотталып кеткен. Оған мемлекеттің 100 миллион теңгесін жымқырды деген айып тағылған. Бірақ үкіммен келіспеген профессор араша сұрап, Дариға Назарбаеваға хат жолдады. Іске Сенат төрайымы араласқан соң, атышулы қылмыстық іс қайта тергеуге жіберіліп, ғалымға тағылған 35 айыптың 8-і негізсіз боп шықты. Нәтижесінде, 8 жыл 3 жарым жылға қысқарды. Жазасын түрмеде өтеп шыққан профессор енді атына келтірілген дақты тазартқысы келеді.  

Ғалымжан Мамытбеков:

- Үмітім - ақталу. Енді ақ атымды қайтару өзіме. Себебі енді өмір бойы ғылыммен айналысып, ақыр аяғында ұры деген атқа қалғым келмейді.

Осылайша, істің ақ-қарасын ажырата алмайтын судьялардың кесірінен профессор 8 жылға сотталып кетуі мүмкін еді. Дәл осы оқиғадан соң Дариға Назарбаева судьялардың жұмысын сынға алған еді. 

Дариға Назарбаева, Сенат төрайымы:

- Маған келіп түсетін шағымдардың көбі судьяның біржақты үкім шығаратыны жайлы. Яғни, дәлел-дәйектер жеткіліксіз болса да, айыпталушыны түрмеге жабатын көрінеді. Тіпті, судьяның тек прокурордың сөзіне құлақ түріп, адвокатты тыңдағысы келмейтіні жайлы арыз көп.

Назарбаеваның сынынан соң Жақып Асанов сауатсыз судьялардың барын амалсыз мойындаған. Бірақ, Жоғарғы Сот төрағасының өкінішінен ғалымға келіп кетер пайда болмай тұр. Өзінің кінәсіз сотталғанына сенімді ғалым құжатынан «сотталған» деген сөзді алып тастау үшін қайта апелляцияға жүгінді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!