Ессіз әйел - Instagram желісінде танымал вайнер ойлап тапқан кейіпкер. Фильмде басты екі рөлді де  Нұрлан Батыровтың өзі сомдайды. Оқыс оқиғадан кейін Нұрланның өмірінде бейтаныс әйел пайда болады. Оның түрі мен ісі жұртты шошытады. Себебі, бетінде сақалы бар және қылықтары қызық. Ал ол қайдан шықты, аты кім, жасы нешеде - ешкім білмейді.

Алмагүл Тілеуханова, «Ессіз әйелдің күнделігі» фильмінің бас продюсері:

- Ессіз әйел персонажы интернеттен келген бейне негізі. Осы бейнені біз үлкен экранға шығарғымыз келді кино ретінде. Өйткені инстаграммда ашылатын қысқа-қысқа күлкілі жағдайлар, олар бүкіл кино өнерінің драматургиясын көрсете алмайды.

Фильмде ессіз әйел өзін тым жоғары бағалайды. Бірақ ерсі қылықтарының тасасында мейірімді де нәзік жүрегі жасырынып жатқандығы байқалады. Ол аз уақыт ішінде сүйіктісінің достары мен жақындарының жүрегін жаулап алады. Туынды авторлары сүю және сүйікті болудың мән-маңызын түсіндіргісі келген. Сондай-ақ, адамның сырт бейнесімен емес, жан дүниесімен сұлу екенін айтуға тырысады.

Нұрлан Батыров, актер: 

- Сіздер фильмде барлығы ессіз әйелді не себепті жақсы көретінін түсінесіздер. Және жаман адам емес екеніне, Нұрланның оны не үшін жақсы көретініне көздеріңіз жетеді. Көбі оның шынайылығы мен адалдығын нашар мінез деп қабылдайды. Бірақ шын мәнісінде ол ақкөңіл, жақсы кейіпкер.

Фильмге түсу Нұрланға аса қиындық тудырмаған. Себебі актер бұл туындысын желідегі вайнның жалғасы әрі қорытындысы дейді. Кино орыс тілінде, бірақ қазақша субтитрмен шыққан. Комедиялық фильмді 16 мамырдан бастап еліміздің барлық кинотеатрларынан көре аласыздар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!