Түлектер форумына жиналғандар - Ұлттық университеттің бір кездегі студенттері. Мұнда әр жылдардағы оқу бітірушілер сағыныш сезімін арқалай келген. Арасында тіпті 60 жыл бұрын бітіргендер де бар.

Сейітқожа Құсайынов, әл-Фараби атындағы ҚазҰУ түлегі:

- 125 адам оқуға түстік. 100 студент геология, 25-і география тобында оқыдық. Қазірдің өзінде солардан қалғаны 15 адамдай бар. Басқалары жасы келіп, келе алмады. Бізге сабақ берген мұғалімдер білім жағынан өте көп нәрсе берді. Солардан алған білім өмір бақиға азық болды.

Түлектер кеші - жыл сайын өтетін дәстүрлі мереке. Ал Форум биыл екінші рет ұйымдастырылып отыр. Оны Алматы қаласының әкімі Бауыржан Байбек Мемлекет басшысы Қасымжомарт Тоқаевтың құттықтау сөзімен ашып берді. Сондай-ақ, ел дамуына үлес қосқан белгілі түлектер қауымдастық атынан арнайы марапаттарға ие болды.

Ермахан Ыбрайымов, Олимпиада чемпионы:

- КазГУ маған білім берді, үлкен өмірге аттандырды. Ал мен КазГУге ойлаймын олимпиаданың қоласы мен алтынын сыйладым деп. 

Биыл Түлектер қауымдастығының құрылғанына - 25 жыл. Оның басты мақсаты - университеттің түрлі буындағы бітірушілерінің арасында қарым-қатынас орнатып, білім ордасына қолдау көрсету.

Ғалымқайыр Мұтанов, әл-Фараби атындағы ҚазҰУ ректоры:

- Әр кәсіпорын өзінің өнімімен мақтанса, біздің өнімдеріміз біздің түлектеріміз. Түлектер қаншалықты қоғамда, экономикада жақсы лауазым, жақсы қызмет атқарып жатса, ол университет жұмысының жақсы бір нәтижесі деп бағалау керек.

Форум үлкен гала концертпен аяқталды. Түлектер өз факультеттеріне жиналып, оларға арнап кампус-тур ұйымдастырылды. Айта кету керек, университет халықаралық рейтингте 800 үздіктің арасында 220-шы орнында тұр. Осылайша топ-250 қатарына енді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!