Осыдан екі жыл бұрын Ақтөбе шетіндегі әуежай маңына отырғызылған көшеттердің сиқы осы. Мың гектар алқапқа егілген қарағай қурап кеткен. Кезінде шенеуніктер қазынадан тоқсан миллион теңге бөліп, болашақта бұл жер ну орманға айналады деп сендірген еді. Бірақ миллион түп көшеттің бірде-бірі өспеген.

Евгений Лазарчук, Ақтөбе қаласының тұрғыны:

- Біз бұл егілген көшеттердің жағдайын қаланы аралап жүргенде көрдік. Ағаштардың бәрі суарылмағаннан, қурап қалған. Ешкім күтпеген. Әйтпесе, көшеттер тамырын жайып үлгерген. Қанша ақша, қанша көшет босқа кетті.

Әкімдіктегілер болса көшеттерді суаруға ақша қарастырылмағанын айтады. Ең қызығы шөлейтті аймақта ылғалды жақсы көретін қарағай сусыз өзі шыға береді деп ойлаған.

Хасен Юсупов, Ақтөбе қалалық ТКШ бөлімінің сектор меңгерушісі:

- Суарусыз өсіретін болғанбыз. Жалпы айтқанда, ол суаруды да қажет етпеген. Жаңа айттым ғой, бұл – суарусыз егу әдісі.

Ал облыстық табиғатты қорғау бысқармасы мамандары бұл жобаның ешбір келісімсіз қолға алынғанын айтады. Өйткені, көшет отырғызбас бұрын сол жердің топырағы да зерттелмеген.

Ғабит Қылышбаев, Ақтөбе облыстық табиғи ресурстар және табиғатты пайдалану, реттеу басқармасының бөлім басшысы:

- Бұл отырғызу технологиялары сақталмауынан болып отыр. Себебі, ол жерге кешіктіріліп егілді. Сосын технология бойынша бір жыл бұрын топырақты дайындап алу керек еді. Сонымен қатар, жергілікті климатқа бейімделмеген екпелердің отырғызылу салдарынан болып отыр.

Шенеуніктер көшет отырғызуға бөлінген тоқсан миллион теңгенің желге ұшқанын мойындап отыр. Бірақ оның сұрауы кімнен болары әзірге белгісіз.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!